Alsír með fjögur mörk og flottan sigur gegn Kóreu

Alsíringar sýndu styrk sinn í kvöld í 4-2 sigri á Belgíu í annarri umferð H-riðils á HM í fótbolta í Brasilíu en leikurinn var stórskemmtilegur og bauð upp á mikla markaveislu.

Alsírliðið komst í 3-0 með þremur mörkum á tólf mínútna kafla í fyrri hálfleik og bætti síðan við fjórða markinu eftir að Suður-Kórea minnkaði muninn í upphafi seinni hálfleiksins.  

Alsíringar voru stigalausir fyrir leikinn eftir 1-2 tap á móti Belgíu í fyrsta leik þar sem liðið var yfir í 45 mínútur. Suður-Kórea er með eitt stig eins og Rússar en á eftir leik á móti Belgíu sem hefur þegar tryggt sér sæti í sextán liða úrslitunum.

Alsír mætir Rússlandi í lokaumferðinni þar sem sæti í sextán liða úrslitunum er undir þó að Suður-Kóreuliðið eigi enn möguleika þrátt fyrir tapið í kvöld.

Islam Slimani kom inn í byrjunarlið Alsír og þakkaði fyrir sig með því að skora fyrsta mark Alsír á 26. mínútu og leggja upp þriðja markið fyrir Abdelmoumene Djabou aðeins tólf mínútum síðar.

Rafik Halliche skoraði annað markið á 28. mínútu með skalla eftir hornspyrnu Abdelmoumene Djabou. Markið kom aðeins tveimur mínútum eftir það fyrsta.

Son Heung-min minnkaði muninn fyrir Suður-Kóreu í upphafi seinni hálfleiks og gaf sínum mönnum smá von en Yacine Brahimi gerði nánast út um hana þegar hann skoraði fjórða mark Alsír tólf mínútum síðar.

Suður-Kóreumenn gáfust þó ekki upp og Koo Ja-cheol minnkaði muninn í 4-2 á 72. mínútu þegar hann skoraði af stuttu færi eftir sendingu Lee Keun-ho. Nær komust þeir ekki og Alsíringar fögnuðu frábærum sigri.