Belgar komnir áfram í sextán liða úrslitin

Belgía vann Rússland 1-0 í H-riðli heimsmeistarakeppninnar í fótbolta í Brasilíu í dag. Eins og í fyrri leik Belgíu kom varamaður liðinu til bjargar.

Belgía byrjaði leikinn betur og sótti mikið framan af leik en Rússland fékk samt besta færi fyrri hálfleiks þegar Aleksandr Kokorin skallaði framhjá skömmu fyrir hálfleik.

Seinni hálfleikur var tíðindalítill framan af í hitanum í Maracana. En þegar tíu mínútur voru eftir af leiknum keyrði Belgía upp hraðann.

Það var svo tveimur mínútum fyrir leikslok að varamaðurinn DivockOrigi hamraði boltann upp í þaknetið eftir frábæran undirbúning Eden Hazard.

Belgía tryggði þar með sæti sitt í 16 liða úrslitum en liðið er með fullt hús stiga eftir tvo leiki. Rússland er með eitt stig eins og Suður-Kórea sem mætir Alsír í kvöld.