Dzeko: Það ætti að senda dómarann heim

Edin Dzeko framherji Bosníu og Hersegóvínu segir að senda ætti dómarann Peter O'Leary heim eftir frammistöðu hans í leik Bosníu og Nígeríu í gær en hann dæmdi löglegt mark Dzeko af í leiknum.

„Við hefðum átt að vinna leikinn,“ sagði Dzeko eftir leikinn í gærkvöld.

„Dómarinn var skelfilegur í keppninni. Við erum á heimleið og erum sorgmæddir þess vegna en dómarinn ætti að vera á heimleið líka. Hann breytti úrslitunum og leiknum. Þess vegna töpuðum við,“ sagði Dzeko sem var bæði ósáttur við að markið sitt hafi ekki fengið að standa og að mark Nígeríu hafi fengið að standa vegna brots Emmanuel Emenike á Emir Spahic fyrirliða Bosníu í aðdraganda marksins.

„Við reyndum að koma til baka eftir markið. Þetta var augljóst brot á fyrirliðanum okkar. Og þegar ég skoraði, það var aldrei rangstæða. Við börðumst allt til enda en heppnin var ekki með okkur.“