Bandaríkin ætla að stöðva Ronaldo og komast áfram

Aron Jóhannsson og félagar í Bandaríska landsliðinu í fótbolta geta tryggt sér sæti í 16 liða úrslitum Heimsmeistarakeppninnar í fótbolta með því að leggja Portúgal að velli í Brasilíu í kvöld.

Leikið er í Manaus í kvöld klukkan 22 og verður leikurinn í beinni útsendingu á Stöð 2 Sport 2. Ekki er ólíklegt að Aron Jóhannsson verði í byrjunarliði Bandaríkjanna en Jürgen Klinsmann þjálfari liðsins leggur allt kapp á að stöðva Cristiano Ronaldo í leiknum.

Ronaldo mætti meiddur til Brasilíu og hefur átt í basli með að ná sér heilum. Hann náði sér engan vegin á strik gegn Þýskalandi í fyrstu umferðinni og þarf að láta ljós sitt skína í kvöld gegn Bandaríkjunum ætli Portúgal ekki að falla úr leik eftir aðeins tvo leiki.

„Ef þú gleymir þér og einbeitir þér of mikið að Ronaldo þá mun einhver annar sigra okkur,“ varaði markvörðurinn Tim Howard við í samtali við fjölmiðla.

„Við þurfum að vera vakandi og passa upp á hættuna, hvaðan sem hún kemur. Við höfum rætt þetta og sett leikinn upp. Nú þurfum við bara að framkvæma okkar leikáætlun.

„Hann er aðal maðurinn,“ sagði Howard um Ronaldo. „Hann er líklega aðal leikmaður keppninnar. Við þurfum að vita hvar hann er. Við þurfum að verjast honum saman og hjálpa hverjum öðrum í vörninni en nei, hann er ekki eina hættan í þeirra liði.“

Jürgen Klinsmann hinn þýski þjálfari Bandaríkjanna segir lið sitt tilbúið að halda aftur af Ronaldo og tryggja sér sæti í 16 liða úrslitum á kostnað Portúgals og Gana.

„Þetta er augnablikið þegar þú getur sannað þig. Þetta er augnablikið til að stíga fram í sviðsljósið og mæta þessum leikmönnum og sigrast á þeim,“ sagði Klinsmann.

„Við viljum sigra Cristiano og lið hans. Við ætlum að mæta til leiks með allan þann kraft sem við búum yfir, með agann og ákveðnina sem býr í liðinu og eigna okkur leikinn.“

Upphitun fyrir leikinn hefst í HM Messunni klukkan 21:10 á Stöð 2 Sport 2 sem sýnir svo leikinn í beinni útsendingu.