Vigdís segir fyrri stjórn hafa forgangsraðað gæluverkefnum

Formaður fjárlaganefndar Alþingis segir þingmönnum fyrri ríkisstjórnar ekki fara vel að gagnrýna núverandi stjórn vegna fjárveitinga til heilbrigðismála. Fyrri stjórn hefði skorið niður um ellefu milljarða til heilbrigðismála en á sama tíma stofnað til gæluverkefna eins og embættis Umboðsmanns skuldara.

Vigdís Hauksdóttir formaður fjárlaganefndar Alþingis sagði í Bítínu á Bylgjunni í morgun að landsmenn hefðu fundið fyrir því á eigin skinni að ríkisstjórnarskipti hefðu orðið fyrir rúmu ári. Mikill viðsnúningur hefði átt sér stað í ríkisfjármálum á þessum tíma.

„Enda voru markmiðin skýr og það var forgangsraðað í þágu þjóðarinnar og almannahagsmuna. Það er það sem við erum að gera og það var kannski mjög bratt, segja sumir, með það markmið að skila hallalausum fjárlögum. Það verður enginn afsláttur gefinn af því og fjárlög ársins 2014 verða hallalaus, sama hvað gengur ár,“ sagði Vigdís í Bítinu.

Vigdís gagnrýndi þær stofnanir sérstaklega sem fengið hefðu aukin fjárframlög á yfirstandandi fjárlagaári, eins og Landsspítalann og lögregluembættin en færu samt fram úr fjárlagaheimildum eins og fram hefði komið undanfarna daga. Það verði að rjúfa þá hefð að stofnanir fari fram úr fjárheimildum og slá í borðið.

Hún gæfi lítið fyrir gagnrýni Oddnýar Harðardóttur fyrrverandi fjármálaráðherra og þingmanns Samfylkingarinnar á núverandi ríkisstjórn.

„Þeir skáru niður 11 milljarða til heilbrigðisstofnana. Við veittum fyrsta árið okkar í ríkisstjórn tæplega 10 milljörðum króna þarna inn í fyrra,“ segir Vigdís. Þegar Heimir Karlsson minnti hana á að það hefði orðið hrun svaraði hún. „Þetta eru akkúrat Samfylkingarrökin, hér varð hrun.“

Síðasta ríkisstjórn hefði verið með ranga forgangsröðun. „Hefði síðasta ríkisstjórn ekki farið í þessi gæluverkefni sem var farið í, ég nefni stjórnlagaþingið, ESB umsóknina, Umboðsmann skuldara og fleiri verkefni sem farið var, það var ekki forgangsraðað í þágu þjóðarinnar eða heilbrigðisþjónustu á síðasta kjörtímabili og ég fullyrði að ef það hefði verið gert værum við komin tveimur árum framar í batanum,“ sagði Vigdís Hauksdóttir í Bítinu á Bylgjunni.

Verkefni umboðsmanns Alþingis hefðu alveg eins getað verið inni í bankakerfinu, enda hefði hvert mál umboðsmanns skuldara kostað ríkissjóð um 16 milljónir króna samkvæmt útreikningum Lilju Mósesdóttur fyrrverandi þingmanns.