Verksmiðju kippt úr sambandi

„Hér á Bíldudal ætluðum við að vera í fullri vinnslu núna en Landsnet tekur af okkur rafmagnið yfir daginn vegna þess að þeir eru að sinna viðhaldi á línu,“ segir Einar Sveinn Ólafsson, framkvæmdastjóri Íslenska kalkþörungafélagsins, sem er ósáttur við vinnubrögð Landsnets.

„Þetta er svona eins og að kaupmaðurinn skellti á þig þegar þú ætlaðir að fara að kaupa í matinn,“ bætir hann við. Hann fékk vitneskju um þetta fyrir rúmum tveimur vikum en rafmagnsskömmtunin tók gildi í gær og mun standa að minnsta kosti næstu níu daga.

Þurrkarar verksmiðjunnar verði því ekki nýttir frá átta að morgni til sjö að kvöldi.

Hann segir ekki hægt að meta þessar búsifjar til fjár. „Ætli þetta séu ekki um þrettán eða fjórtán hundruð tonn af framleiðslu,“ segir hann. Ragnheiður Elín Árnadóttir iðnaðarráðherra átti í gær fund með forsvarsmönnum fyrirtækisins, en hún er á ferð um Vestfirði, og var rafmagnsskerðingin á meðal umræðuefna. Ráðherrann segist skilja að það skipti máli að menn tali saman í svona tilvikum. „Það er gott að menn láti vita af svona atvikum með fyrirvara ef það er hægt,“ segir Ragnheiður Elín Árnadóttir iðnaðarráðherra. Að öðru leyti vísaði hún á Landsnet, en Fréttablaðið náði ekki tali af forstjóra Landsnets.

Samkvæmt heimildum Fréttablaðsins kveður samningur Landsnets og fyrirtækisins á um skerðanlegan flutning á raforku og samkvæmt honum er Landsneti heimilt að skerða flutning meðal annars vegna viðhalds á flutningskerfinu.

Einar Sveinn segist vissulega fagna því að verið sé að bæta aðstöðuna fyrir rafmagnsflutningana og segist hafa skilning á því að svona verði að bregðast við þegar á þeim stendur en hann hefði þó óskað þess að haft hefði verið meira samráð við félagið. „Ef þetta hefði legið fyrir mánuðum fyrr þá hefðum við getað aðlagað okkur að þessu og gefið starfsfólkinu frí þennan tíma,“ segir hann.

Vélar verksmiðjunnar á Bíldudal þurfa um þrjú og hálft megavatt en það er um tíu prósent af allri rafmagnsnotkun á sunnanverðum Vestfjörðum.