„Það eru stjarnfræðilegar líkur á þessu“

Hermann Þór Þorbjörnsson, rafvirki á Ísafirði, varð fyrir því óláni í gær að skot úr naglabyssu frá fimmta áratug síðustu aldar sprakk í andlitið á honum. BB greindi fyrst frá.

Hermann Þór segist í samtali við Vísi hafa verið að bora í steinsteypan vegg í grunnskólanum á Ísafirði. Hann var rétt kominn inn í vegginn þegar mikill hvellur heyrðist. Um leið fékk hann steypu, ryk og möl yfir sig allan.

„Ég hélt fyrst að ég hefði borað í gegnum rafleiðslur,“ segir Hermann Þór í samtali við Vísi. Hann hafi hlaupið fram á klósett og skolað augu sín sem hann hafi varla getað opnað fyrir ryki.

„Þegar ég sé lítil sár í andlitinu þá hringi ég á sjúkrabíl.“

Sjónin slapp

Á sjúkrahúsinu voru litlir steinar plokkaðir úr andliti Hermanns Þórs. Þá var lítil steinvala sem fór í auga hans fjarlægð með nál. Þar sem um vinnuslys var að ræða mættu lögregla og vinnueftirlitið á vettvang til að rannsaka slysið.

„Lögreglan fann leyfar af af hylki utan af naglabyssuskotinu í gatinu í veggnum þar sem ég var að bora,“ segir Hermann Þór. Augljóslega hafi verið um naglabyssuskot enda hafi þau verið notuð mikið þegar skólinn var smíðaður á fimmta áratug síðustu aldar.

„Það eru stjarnfræðilegar líkur á þessu,“ segir Hermann Þór en betur hafi farið en á horfðist. Hann hafi til að mynda fengið stóra völu í bringuna sem hafi brennt gat á bol hans.

„Ég vil ekki hugsa þá hugsun til enda hefði hún farið í augað.“

Aðspurður segist Hermann ætla að taka því rólega næstu daga og leyfa sárum sínum að gróa áður en hann snúi aftur til vinnu. Hann reiknar ekki með því að það muni reyna á taugar sínar næst þegar hann bori í vegg.

„Ég hef nú borað milljón göt um ævina og ég fer ekki að hætta því,“ segir Hermann Þór hlæjandi.