Svangar hnísur í Jökulsárlóni

Afar óvenjuleg sjón blasti við mönnum við Jökulsárlón fyrr í mánuðinum en þar voru á ferð svangar Hnísur.

Líkt og sæskrímsli

Hnísan, minnsta hvalategundin hér við land, sást á ansi óvenjulegum slóðum fyrir skömmu. Jóhannes Sturlaugsson hjá Laxfiskum náði fágætum myndum af hnísum sem voru komnar upp í gegnum lónið og virtust graðka í sig loðnu. Á yfirborðinu var sem að þarna færi sæskrímsli með kryppu þegar hnísurnar fóru upp og niður í vatninu. Hér má sjá myndband af hnísunum sem Jóhannes Sturlaugsson í Laxfiskum tók.

Lítill og nettur hvalur

Æti hnísunnar er loðna, sandsíli og þorskfiskar og þyngd hvalsins lanng undir hundrað kílóum og lengdin ekki meiri en tveir metrar. Ekkert bendir til þess að neitt ami að þessum hnísum þótt þær færu á óvenjulegar slóðir, sagði Gísli Víkingsson, hvalasérfræðingur í fréttum Stöðvar tvö.

Ferska vatnið er ekki kjörlendi

„Þetta er mjög óvenjulegt, ég hef ekki heyrt af því áður að hnísan fari í lónið eða í annað ferskvatn hér á landi en samt eru til dæmi um það erlendis frá að þær gangi jafnvel töluvert upp ár en þetta er samt ekki þeirra kjörlendi, heldur saltur sjór“, sagði Gísli. „Hnísan er annáluð grunnsævistegund og nánast eingöngu við strendur“. Gísli segir að með það í huga sé í sjálfu sér ekki koma á óvart að hnísan hafi farið inní lónið og svo nærri landi eða hafi „skotist þarna inn í lónið“, svo notuð séu orð Gísla.

Hann telur að hnísurnar hafi örugglega sótt í fæðu í lóninu og ekkert bendi til þess að neitt ami að þeim þótt þær hafi farið á óvenjulegar slóðir.

Algengt er að selir sjáist inni í lóninu og ekki er útilokað að hnísur komi þangað af og til þótt menn hafi ekki fyrr en nú náð því á mynd.