40 grömm af grasi og allar fangageymslur fullar

Að sögn varðstjóra á Akureyri var „heill hellingur“ var að gera hjá lögreglunni á Dalvík í tengslum við Fiskidaginn Mikla sem fram fór í bænum um helgina. Þrátt fyrir að hafa ekki nákvæmar tölur um fjölda afbrota að svo stöddu gat lögreglan staðfest í samtali við Vísi að þó hafi ekki verið um nein stórslys að ræða þrátt fyrir að erill hafi verið töluverður.

Dagbók lögreglunnar er full af færslum um afskipti af ölvuðum hátíðargestum og voru nokkrir sendir til „kælingar“ í fangageymslu bæjarins. „Ætli þið getið ekki sagt að allar fangageymslur hafi verið fullar á Dalvík, enda einungis tveir fangaklefar í bænum,“ bætti varðstjórinn kíminn við.

Þrátt fyrir það voru allar stympingar smávægilegar, engar alvarlegar líkamsárásir áttu sér stað í bænum og enginn var lagður inn til frekari aðhlynningar. Engin kynferðisbrotamál hafa verið tilkynnt lögreglunni eftir Fiskidaginn.

Þá var töluvert um of hraðan akstur til og frá Dalvík meðan á hátíðinni stóð. Þrír voru einnig stöðvaðir fyrir ölvunarakstur og tveir voru teknir undir áhrifum fíkniefna.

Þrátt fyrir að um neysluskammta hafi verið að ræða í flestum þeim fíkniefnamálum sem komu upp á hátíðinni voru að minnsta kosti tveir stöðvaðir með stærri skammta. Annar var með 40 grömm af grasi á sér og ætlaði hann sér að selja góssið. Þá var hinn stöðvaður með 10 grömm af amfetamíni en ekki er vitað hvað hann ætlaði sér með svo stóran skammt. „Ef hann ætlaði sér ekki að selja efnin þá hefði hann svo sannarlega geta komist í mikið stuð,“ sagði varðstjórinn enda um töluvert magn að ræða.