Bæjarstjórn Akureyrar einhuga um mikilvægi Reykjavíkurflugvallar

Þremenningarnir í bæjarstjórn Akureyrar sem sátu hjá í afgreiðslu ályktunar um staðsetningu Reykjavíkurflugvallar gerðu það einungis vegna síðustu setningar ályktunarinnar. Þar segir að það komi „ekki á óvart að Alþingi láti málið til sín taka, þegar sérhagsmunir ganga fyrir almannahagsmunum.“

„Það var síðasta setningin í ályktuninni sem ég gat ekki sætt mig við,“ segir Logi Einarsson, fulltrúi Samfylkingarinnar í bæjarstjórn og einn þeirra þriggja sem sátu hjá í kvöld. „Það að mönnum finnist skiljanlegt að tillaga liggi fyrir Alþingi að taka skipulagsvaldið af borginni.“

Logi, ásamt þeim Sigríði Huld Jónsdóttur og Margréti Kristínu Helgadóttur, lagði fram breytingartillögu þar sem þessi setning er tekin út. Þar, líkt og í ályktuninni sem samþykkt var að lokum, er lýst yfir þungum áhyggjum af framtíð Reykjavíkurflugvallar í ljósi fyrirhugaðra framkvæmdra á Hlíðarendasvæðinu. Sú skoðun er ítrekuð að Reykjavík, sem höfuðborg Íslands, hafi víðtækum skyldum að gegna gangvart landsmönnum öllum.

Dagur Fannar Dagsson, bæjarfulltrúi L-listans, tjáir sig um fundinn á Facebook-síðu sinni. Hann segir alla bæjarfulltrúa, að sínu viti, hafa verið sammála um að Rögnunefndin ætti að fá frið til sinna verka.

„Ágreiningsefnið var í meginatriðum, að mínu mati, hvort að nefndin væri að fá þann frið sem hún á svo sannarlega skilið,“ skrifar Dagur. „Mitt mat er það að friðurinn hafi verið rofinn og af þeim sökum studdi ég mjög beinskeytta bókun sem beint var bæði til Borgarstjórnar Reykjavíkur og Alþingis Íslands.“

Bókunin sem þremenningarnir úr Samfylkingunni og Bjartri framtíð lögðu til er birt í heild sinni hér fyrir neðan.

Við lýsum þungum áhyggjum sínum af framtíð Reykjavíkurflugvallar í ljósi fyrirhugaðra framkvæmda á svæðinu.

Bæjarstjórn hvetur Reykjavíkurborg til þess að fresta öllum samþykktum um áframhaldandi uppbyggingu á svæðinu, a.m.k þar til Rögnunefndin hefur lagt fram niðurstöður sínar og landsmönnum verið gefið nægt ráðrúm til þess að fjalla um þær.

Reykjavík er miðstöð stjórnsýslu og mikilvægustu stofnana landsins. Íbúar hafa því mikla hagsmuni af því að eiga sem greiðasta leið að henni. Þá er hún er jafnframt höfuðborg Íslands og hefur sem slík víðtækum skyldum að gegna gagnvart landsmönnum öllum.