Bjarni sver af sér nýfrjálshyggju

Fjármálaráðherra segir ríkisstjórnin hafa sett hag heimilanna í forgrunn og aðgerðir hennar á þessu ári og næsta skili heimilunum aftur um 40 milljörðum króna. Það standist ekki skoðun að stefna ríkisstjórnarinnar einkennist af nýfrjálshyggju.

Bjarni Benediktsson fjármálaráðherra mælti fyrir öðru fjárlagafrumvarpi sínu á Alþingi í morgun, en samkvæmt því er stefnt að 4,1 milljarði í tekjuafgang á rekstri ríkissjóðs á næsta ári. Síðustu fjárlög voru einnig lögð fram með markmiði um afgang upp á 900 milljónir króna en afgangur stefnir nú í 38 milljarða króna afgang, aðallega vegna sérstakar arðgreiðslna frá bönkunum og Seðlabankanum, mest vegna greiðslna frá Landsbankanum.

Bjarni sagði núverandi fjárlagafrumvarp leiða til 0,5 prósenta aukningar ráðstöfunartekna heimilanna og 0,2 prósenta lækkunar verðlags. Þá ætti eftir að telja fram áhrif af skuldaleiðréttingaraðgerð ríkisstjórnarinnar sem gæfi annað eins.

„Þannig að framundan er tímabil þar sem við getum hafið niðurgreiðslu skulda að raunvirði og verður það grundvallaratriði í langtímaáætlun ríkisfjármála næstu árin. Markvisst er þannig stefnt að lækkun skulda og þar með vaxtagjalda,“ sagði hann í þinginu í morgun.

Bjarni sagði áherslur ríkisstjórnarinnar miða að því að lækka skatta á einstaklinga og fyrirtæki. Stjórnarandstaðan sakaði ríkisstjórnina um nýfrjálshyggju og að fjarlægjast hið norræna velferðarkerfi. Fjármálaráðherra sagði ríkisstjórnina hins vegar stefna að því að byggja upp hið íslenska velferðarkerfi sem kæmi fram í auknum framlögum til aldraðra, öryrkja og með almennum lækkunum skatta og gjalda.

„Ríkisstjórn Sjálfstæðisflokks og Framsóknarflokks hefur sett hag heimilanna í forgrunn. Þetta má sjá á öllum þessum markvissu aðgerðum til að auka ráðstöfunartekjur þeirra. Samanlögð áhrif skattalækkana á árunum 2014 og '15,  ásamt hækkun bóta og lækkun húsnæðiskulda skila aftur út til fólksins í landinu um 40 milljörðum króna í hærri ráðstöfunartekjur þegar borið er saman við árið 2013. Og kannski felst í þessu mesta stefnubreytingin: Vegna þess að eins og talað er af þeim sem studdu fyrri stjórn, þá er það augljóst að þessum fjármunum hefði öllum verið veitt til ríkisins, til verkefna sem ríkið hefði staðið að baki,“ sagði Bjarni Benediktsson.