Fallinna hermanna í fyrri heimsstyrjöldinni minnst

Þess var minnst í Bretlandi og Belgíu í dag að um þessar mundir eru eitt hundrað ár frá því fyrri heimsstyrjöldin hófst. Forsætisráðherra Bretlands segir styrjöldina hafa haft víðtæk áhrif og breytt bresku samfélagi.

Hertogahjónin Vilhjálmur og Katrín af Cambridge heiðruðu þá sem féllu í fyrri heimsstyrjöldinni í belgísku borginni Liege í Belgíu í dag, ásamt Franocis Holland Frakklandsforseta, Baldvini Belgíukonungi, Matthildi drottningu og fleiri fyrirmennum í dag. En fyrsta orrusta stríðsins fór einmitt fram við borgina þennan dag fyrir einni öld. Rúmlega 17 milljónir hermanna og óbreyttra borgara féllu í stríðinu.

Harry Bretaprins var viðstaddur athöfn í Folkestone á suður Englandi en þar fóru níu milljónir hermanna um á leið sinni til vígstöðvanna í Evrópu. Harry vígði minningarboga um þá sem féllu og lagði blómsveig að öðru minnismerki. Karl faðir hans var hins vegar viðstaddur minningarathöfn í Glasgow í Skotlandi þar sem minnst var framlags hundruð þúsunda íbúa samveldislandanna sem börðust með Bretum í stríðinu.

Þá hafa listamenn komið fyrir hafi af rauðum keramik valmúablómum við Tower of London sem þeir kalla „Blóð rann yfir land og haf“ og mun blómunum fjölga fram til 11. desember en þann dag árið 1918 lauk fyrri heimsstyrjöldinni.

David Cameron forsætisráðherra Bretlands sagði í Skotlandi í dag að fyrri heimsstyrjöldin hefði haft gríðarleg áhrif á hverja einustu fjölskyldu í öllum þjóðfélagsstigum Bretlands og mótað tilveru þeirra eftir það.

„Umfang slátrunarinnar var gífurlegt. Fyrir þær sakir væri mikilvægt að minnast þessara atburða en einnig allra þeirra ungu karla og kvenna sem trúðu því að þau væru að verja tilverurétt smáríkis, Belgíu, og koma í veg fyrir að eitt ríki Evrópu gnæfði yfir önnur. Þar hafi verið grundvallar hugsun á ferð sem vert er að minnast enn í dag,“ sagði Cameron.