Kvartaði undan málþófi stjórnarandstöðunnar

Ásmundur Friðriksson, þingmaður Sjálfstæðisflokks, kvartaði undan málþófi í morgun og yfir orðum Oddnýjar G. Harðardóttur og Sigríðar Ingibjargar Ingadóttur, þingmanna Samfylkingarinnar, frá því í gær. Sagðist hann sjálfur hafa kvartað við samflokksmenn sína á síðasta kjörtímabili vegna málþófs sem hann telur til skammar fyrir þingið.

Steingrímur J. Sigfússon, þingmaður Vinstri grænna, svaraði Ásmundi og benti á að þingstörfin gengu vel. Gert er ráð fyrir þinglokum í dag að lokinni þriðju umræðu um fjárlög næsta árs.

„Það kemur úr hörðustu átt að sjálfstæðismaður, sem vissulega segist hafa gagnrýnt sína flokksfélaga á síðasta kjörtímabili, skuli tala hér á þingi um málþóf þegar við erum í þann veginn að ljúka störfum 16. desember, óvenju snemma. Hér hafa þingstörf gengið óvenju greiðlega fyrir sig, „ sagði hann og bætti við: „Það er eins fráleitt og nokkuð getur verið að tala um slíkt.“

Ásmundur sagði ekkert til í því sem Oddný sagði á Facebook-síðu sinni í gær að stjórnarþingmenn á Suðurnesjum væru að flytja störf í burtu af svæðinu. „Stjórnarþingmennirnir af Suðurnesjum styðja hins vegar að færa 700 mkr frá Isavia sem nýta átti til framkvæmda við Leifsstöð og með því fara mörg störf frá okkur Suðurnesjamönnum,“ sagði hún á Facebook-síðu sinni.

Þessu mótmælti Ásmundur harðlega. „Þetta eru ósannindi. Það eru engin störf að fara í burtu út af því á Suðurnesjum. Það er mikil uppbygging fram undan,“ sagði hann.

Ásmundur gerði einnig gagnrýni Sigríðar Ingibjargar á forgangsröðun Sjálfstæðisflokksins í menningarmálum að umræðuefni en hún setti hana í samhengi við umræðu um kirkjuheimsóknir grunnskólabarna.

Sigríður Ingibjörg sakaði flokksmenn Sjálfstæðisflokksins um „djöfulsins teboðshræsni“ á Facebook-síðu sinni og vísaði þar til Teboðsframboðanna hægrisinnuðu í Bandaríkjunum. 

„Ég, sem hef rætt hér um góð gildi lífsins og kristna trú sem er mér hugleikin, fæ kalda kveðju frá góðum samstarfsmanni í velferðarnefnd, háttvirtur þingmaður Sigríði Ingibjörgu Ingadóttur, sem kallar mig teboðshræsnara fyrir að tala um góð gildi lífsins,“ sagði Ásmundur. 

Spurði hann hvort þetta væri andinn sem þingmenn vildu að ríkti í þinghúsinu. „Er þetta samstarfsandinn sem við viljum að ríki í þessu húsi? Ég trúi því ekki.“