Íslensku stúlkurnar í Prag komnar til Íslands

Stúlkurnar tvær sem voru í fangelsi í Tékklandi eru komnar aftur til Íslands. Þær komu til landsins á föstudag og eru nú í kvennafangelsinu í Kópavogi þar sem þær munu afplána dóm fyrir fíkniefnasmygl.

Formleg framsalsbeiðni stúlknanna var send innanríkisráðuneyti Tékklands í júníbyrjun og hófst framsalsferlið viku síðar, en á Íslandi er í gildi Evrópusamningur um framsal fanga. Því stóð allan tímann til að stúlkurnar yrðu framseldar til Íslands til að afplána það sem eftir er af dómnum.

Aðalsteina Kjartansdóttir og Gunnhildur Svava Guðmundsdóttir voru handteknar á flugvelli í Prag, höfuðborg Tékklands í nóvember 2012, en þá voru þær átján ára gamlar. Í fórum þeirra fundust þrjú kíló af kókaíni, sem eru um sextíu þúsund söluskammtar samkvæmt tékkneskum dómstólum.

Þær höfðu flogið til Prag frá Sao Paulo í Brasilíu þar sem þær samþykktu að gerast burðardýr. Fíkniefnin voru afar haganlega falin í farangurstösku stúlknanna. Upphaflega stóð til að þær gleyptu fíkniefnin og smygluðu þeim milli landa innvortis.

Viðurlög við fíkniefnasmygli eru afar hörð í Tékklandi og voru Aðalsteina og Gunnhildur dæmdar í sjö og sjö og hálfs árs fangelsi í nóvember á síðasta ári. Áfrýjunardómstóll mildaði refsingu þeirra niður í fjögur og hálft ár í febrúar. Fram að því höfðu þær setið inni í sitthvoru fangelsinu í Prag, en eftir að dómarnir voru mildaðir voru þær báðar fluttar í fangelsi sem er í um 200 kílómetra fjarlægð frá höfuðborginni. Þar störfuðu þær saman í súkkulaðiverksmiðju.