Þátttakandi grunar Löður um græsku

Þátttakandi í keppni sem bílaþvottastöðin Löður hélt síðasta mánuðinn er allt annað en sáttur með framkvæmd keppninnar. Fyrirtækið auglýsti eftir þrjátíu sekúndna myndböndum sem tengdust stöðinni og hlyti besta myndbandið í verðlaun eina milljón króna.

Upphaflega átti að vera hægt að senda inn myndbönd til 7. nóvember en síðar var viku bætt við keppnina. Að lokum var það Ómar Ragnarsson sem bar sigur út bítum.

Nokkrir þátttakendur hafa sett út á framkvæmd keppninnar á samfélagsmiðlum. Þeirra á meðal er Hulda Björg Jónsdóttir en í færslu á Facebook gerir meðal annars athugasemd við að fresturinn hafi verið framlengdur og ýjar að því að Löður hafi fengið Ómar til að taka þátt. Færsluna má sjá í heild sinni neðar í fréttinni.

„Mér þykir þetta svolítið skrítið. Myndbönd frá mér enduðu í öðru og þriðja sæti keppninnar en samt sem áður var ég ekki boðuð í myndatöku fyrir efstu fimm þátttakendurna sem fram fór síðasta fimmtudag og en hins vegar var þar fólk sem var ekki einu sinni í efstu fimm sætunum,“ segir Hulda Björg í samtali við Vísi.

Meðal þeirra sem boðaðir voru í téða myndatöku var Hafsteinn Gunnar Hafsteinsson. Er Vísir heyrði í honum sagðist hann hafa átt spjall við aðstandendur Löðurs og tekið þeirra svör góð og gild. Viðstaddur myndatökuna hafi til að mynda verið Jakob Frímann Magnússon, Stuðmaður og fyrrum menningarsendiherra.

„Ómar bar höfuð og herðar yfir aðra“

„Ég kannast við eiganda Löðurs og hann fékk mig til að koma keppninni á framfæri,“ segir Jakob Frímann. „Þegar upprunalegi skilafresturinn rann út höfðu aðeins sex myndbönd borist og því var brugðið á það ráð bæta við einni viku. Það var auglýst á mörgum miðlum þó láðst hafi að breyta því á síðu keppninnar.“

„Í kjölfarið bárust tæplega þrjátíu myndbönd í keppnina og þeirra á meðal myndbandið hans Ómars. Það bar einfaldlega höfuð og herðar yfir önnur myndbönd. Það sést best á því að á Youtube þá er hans myndband með yfir 12.000 áhorf eða nærri því tífalt fleiri en næsta myndband.“

„Þetta er hið leiðinlegasta mál allt saman,“ segir Páll Mar Magnússon, framkvæmdastjóri Löðurs. „Við ákváðum að halda þessa keppni og gefa milljón en bárust í upphafi fá myndbönd og lengdum því frestinn sem er alls ekki óalgengt.“

Hann bendir á að það sé ekkert óeðlilegt við þátttöku Ómars. Tveir fjölskyldumeðlimir hans hafi til að mynda sett saman myndband og sent inn og þá hafi hann sjálfur átt eitt myndband.

„Hefðum við viljað hafa einhvern óþef af keppninni þá hefði ég togað í spotta og látið sjálfan mig vinna. Það var óháð dómnefnd saman sett af bílaáhugamanni, kvikmyndagerðamanni og einum úr auglýsingabransanum. Sum myndbandanna voru of löng og því sjálfkrafa ógild en dómnefndin mat það svo að Ómar hefði verið með besta myndbandið.“

Aðspurður um hví það hafi verið tekið við myndböndum einungis klukkutíma fyrir skilafrestinn bendir hann á að þvottastöðvar Löðurs séu opnar allan sólarhringinn. Það sé ávallt einhver við vaktsímann sem sé tilbúinn að aðstoða viðskiptavini.

Post by Hulda Björg Jónsdóttir.