870 nemendur hættu námi án þess að ljúka prófum

Tæplega 870 nemendur sem skráðir voru í nám í framhaldsskólum í upphafi vorannar 2014 hættu námi án þess að ljúka prófum í lok annarinnar. Þetta kemur fram í skýrslu menntamálaráðuneytisins um brotthvarf úr framhaldsskólum vorið 2014.

Alls var 247 nemendum vísað úr skóla vegna brota á skólareglum, sem er algengasta ástæða brotthvarfs. Gert er ráð fyrir að um sé að ræða nemendur sem ekki stóðust viðmið um reglur er varða mætingar.

Kallað var eftir upplýsingum í byrjun vorannar frá öllum framhaldsskólum um ástæður nemenda fyrir brotthvarfi. Þrjátíu skólar af þrjátíu og einum skiluðu inn niðurstöðum skráninga til ráðuneytisins í lok vorannar. Í kjölfarið var haft samband við alla nemendur sem hættu námi á önninni.  

Á vef menntamálaráðuneytisins segir að sjaldnast sé ein ástæða sem liggi að baki því að nemendur hætti í námi. Þó hafi verið óskað eftir að skráð yrði meginástæða fyrir brotthvarfi hvers og eins. Þá segir að upplýsingar um brotthvarf einstakra skóla, tegund náms eða skóla verða ekki birtar.