Hefur þú séð þessa konu?

Ný auglýsing Krabbameinsfélagsins er ansi hreint drungaleg en hún er gerð til að vekja athygli á Bleiku slaufunni. Árvekniátakið Bleika slaufan stendur til loka októbermánaðar og í ár er lögð áhersla á að fá fleiri konur til að mæta reglulega til leitar að leghálskrabbameini hjá Leitarstöð Krabbameinsfélagsins.

Í nýju auglýsingunni er leitað að ýmsum, týndum konum og fer leikkonan Elma Stefanía til að mynda með hlutverk í henni.

Næstum því helmingur kvenna mætir ekki til leitar að leghálskrabbameini innan tilskilins tíma. Nú deyja að meðaltali tvær konur á ári úr leghálskrabbameini en öllum konum á aldrinum 23 til 65 ára er boðið að koma í leit á þriggja ára fresti. Konum á aldrinum 40 til 69 ára er enn fremur boðið í brjóstaleit á tveggja ára fresti.

Bleika slaufan í ár er hönnuð af Stefáni Boga Stefánssyni, hönnuði og gull- og silfursmið en sala slaufunnar stendur yfir í tvær vikur. Sem fyrr er markmiðið að selja fimmtíu þúsund slaufur.