Ágúst Guðmundsson: Á ekki annan kost en að lögsækja

Ágúst Guðmundsson leikstjóri segir frá reynslu sinni af myndbandsdreifingarrisanum Youtube í grein sem birtist í Fréttablaðinu og á Vísi í dag. Ágúst segist hafa haft samband við fyrirtækið eftir að hann uppgötvaði að kvikmynd hans, Ófeigur gengur aftur, hafði verið gerð aðgengileg í heild sinni á vefsíðunni.

„Þessu var vel tekið,“ skrifar Ágúst, „og 2. júlí fékk ég tilkynningu um að myndin hefði verið fjarlægð af vefnum.“

Stuttu síðar hafi honum þó borist annað bréf frá Youtube vegna þess að sá sem hlóð myndinni inn á síðuna hafði á móti kvartað til fyrirtækisins og ekki skilið hvers vegna henni hafi verið kippt út. Ágúst segir að í bréfinu hafi forsvarsmenn Youtube ráðlagt honum að fara einfaldlega í mál við þann sem hlóð Ófeigi inn á síðuna.

„Ég á því ekki annarra kosta völ en að lögsækja einhvern ungan mann í Njarðvíkunum, sem ég þekki ekkert til,“ skrifar Ágúst. „Enn síður veit ég hvað veldur þessum mikla áhuga hans á að sýna á opinberum vettvangi kvikmynd sem hann á ekkert í. Ég veit bara að hann varði ekki tveimur árum ævi sinnar í að gera þessa kvikmynd, hann veðsetti ekki húsið sitt fyrir tíu milljónir hennar vegna og hann tók hvorki við lofi né lasti þegar myndin náði loksins upp á silfurtjaldið.“

Leikstjórinn þekkti kveðst ósáttur við það að mynd sinni, og öðrum listaverkum, sé dreift ókeypis á vefsíðum og vill að stjórnvöld eða listamennirnir sjálfir geri eitthvað í málinu.

„Samtök listamanna þurfa að stíga fram til að verja réttindi síns fólks á þessu sviði. Veitufyrirtækin geta með einföldum hætti komið í veg fyrir þessar gripdeildir. Það má hins vegar ekki heyra á það minnst að sú kvöð sé lögð þeim á herðar. Í staðinn koma athugasemdir um tjáningarfrelsi eða netfrelsi eða alls konar frelsi. Í mínum eyrum hljómar það eins og ákall um frelsi til að taka frá mér það sem ég á.“