Ekki hægt að auka fjárframlög til þróunarsamvinnu

Framlög Íslands til alþjóðlegrar þróunarsamvinnu standa í stað á milli ára samkvæmt fjárlagafrumvarpi næsta árs. Gert er ráð fyrir að hlutfall af vergri landsframleiðslu verði áfram 0,22%. Það er mun minna en gert er ráð fyrir í þingsályktun um áætlun um alþjóðlega þróunarsamvinnu og samþykkt var á Alþingi í tíð síðustu ríkisstjórnarinnar. Samkvæmt henni ættu framlög til þróunarmála árið 2015 að nema 0,35% af vergri landsframleiðslu.

Fram kemur í athugasemdum með fjárlagafrumvarpinu að ekki sé unnt að hækka framlögin vegna erfiðrar stöðu ríkissjóðs og aðhalds í ríkisfjármálum.

 

Samkvæmt skýrslu sem Þórir Guðmundsson vann fyrir utanríkisráðuneytið um þróunarsamvinnu og gefin var út í júlí sl. stendur Ísland langt að baki Norðurlöndunum þegar kemur að framlögum til þróunarmála. Í skýrslunni eru teknar saman tölur frá árinu 2013 og kemur fram að Norðurlöndin verja á milli 0,55% til 1,07% af vergri landsframleiðslu til þróunarmála.