Samúðarfylgi Sjálfstæðisflokksins

Framsóknarmenn furða sig á því að Sjálfstæðisflokkurinn sæki í sig veðrið í nýrri könnun meðan þeir sjálfir mælast einungis með tæp 12 prósent. Sigrún Magnúsdóttir, þingflokksformaður Framsóknarflokksins, veltir því fyrir sér hvort þjóðarsálin sé farin að vorkenna Sjálfstæðismönnum það hversu hart er gengið fram í hinu svokallaða Lekamáli, sem reynst hefur Hönnu Birnu Kristjánsdóttur innanríkisráðherra, og þar með flokknum, afar erfitt.

Stjórnarflokkar með 21 prósent fylgi

Fréttablaðið birti í dag könnun sem leiðir það í ljós að Sjálfstæðismenn njóta nú fylgis meðal 30 prósent kjósenda. Ekki er allt sem sýnist eins og ýmsir, svo sem Stefán Jón Hafstein, áhugamaður um íslensk stjórnmál bendir á; helstu séu ekki gott gengi Sjálfstæðisflokksins eru ekki tíðindin sem könnunin ber með sér heldur þau að um meirihluti aðspurðra vill ekki leggja lag sitt við neinn flokkanna. Óákveðnir eru 23 prósent, þeir sem ætla ekki að kjósa eru 15 prósent og 13 prósent neita að svara. Stefán Jón metur það svo að Sjálfstæðisflokkur fái 15 prósent, Samfylking 10, Framsókn og VG styðji sex 6 prósent og Píratar fimm.

„Samtals eru óákveðnir, ætla ekki að kjósa og neita að svara með meirihluta atkvæða og geta myndað stjórn. Þessi hópur hefur stækkað mjög síðan í borgarstórnarkosningunum í vor þegar kjörsókn var í sögulegri lægð,“ skrifar Stefán Jón á sinn Facebookvegg og eru margir til að taka í sama streng.

Framsóknarmenn hafa ekki sagt sitt síðasta

En, þetta breytir ekki því að meðal þeirra sem taka afstöðu er Sjálfstæðisflokkurinn með 30 prósent en Framsóknarflokkurinn tæp 12. Sigrún Magnúsdóttir er þingflokksformaður framsóknarmanna. Hún segir þetta sérkennilega stöðu í ljósi þess að nú er helsta kosningamál flokksins sem eru aðgerðir í málefnum þeirra sem skulda húsnæðislán. Hvernig slær þetta Sigrúnu?

„Þetta getur náttúrlega ekki slegið mig vel. Og maður vissulega veltir þessu fyrir sér. EF til vill er skýringin sú að menn kusu Framsóknarmenn til góðra verka, það er treyst á Framsóknarflokkinn til framkvæmda og framkvæmdin er að ganga í garð einmitt um þessar mundir. Og þá bíður fólk eftir því næsta sem Framsóknarflokkurinn ætlar að framkvæma. Og ég get lofað þér því að við munum standa okkur á þessu kjörtímabili. Það er ekki búið. Við spyrjum að leikslokum,“ segir Sigrún.

Þingflokksformaðurinn metur þetta sem svo að hugsanlega líti kjósendur svo á að Framsóknarflokkurinn hafi nú efnt loforð sitt og hafi því lokið erindi sínu.

Of galvaskir framsóknarmenn

Bjarni Benediktsson, formaður Sjálfstæðisflokks, þakkar gott gengi í könnuninni stöðugleika og auknum kaupmætti almennings. En, hvernig má það vera að Sjálfstæðismenn einir njóti góðs af því nú þegar ríkisstjórnin er undir forystu Framsóknarflokksins?

„Stórt er spurt og ég get lítið svarað þessu,“ segir Sigrún. En, óvænt svar gæti verið að finna við það að líta hins margumrædda og umdeilda Lekamáls, sem ekki virðist hafa nokkur áhrif á fylgi Sjálfstæðisflokksins, nema síður sé. „Það getur vel verið að það sé komin ákveðin samúð til Sjálfstæðisflokksins. Að fólki finnist bara of langt gengið? Nei, ég velti því fyrir mér. Þetta er svo fín lína. Þú veist nú hvernig Bjarni snéri dæminu við í kosningabaráttunni, fékk samúðina með því að aðeins svona vökna um augu í sjónvarpinu; það er þegar maður fær þjóðarsálina til að vorkenna sér. Við erum kannski of galvösk, framsóknarmenn?“ spyr Sigrún og varpar um leið fram athyglisverðri kenningu með spurningu sinni.