Nýkeyptur bíll ónýtur: „Ég fer bara á skriðdreka næst“

„Þetta var eiginlega bara uppáferð,“ segir Þóra Lind Bjarkardóttir hlæjandi. Norðfirðingurinn varð fyrir einkar óvenjulegri lífsreynslu þegar hún sótti fund á Egilstöðum í gær.

Þóra hélt til fundarins á bíl sínum sem hún hafði keypt viku fyrr. Fundurinn var hafinn þegar kona gengur inn og spyr hver sé eigandi bílsins á bílastæðinu með einkanúmerið „Miðbær“.

„Hvað gerði ég af mér núna?“ spurði Þóra en fékk þau svör að hún væri saklaus. Það væri hins vegar einhver búinn að aka bíl sínum ofan á bíl hennar. Þegar út var komið blasti ótrúleg sjón við Þóru. Rauður bíll sat sem fastast ofan á bíl hennar. Hafði honum verið ekið af efri hluta bílastæðisins sem er líklega um metra hærri en sá neðri.

„Ég fékk þau svör frá löggunni að konan sem ók hinum bílnum hefði frosið á bensíngjöfinni,“ segir Þóra. Hún hafi spólað upp á húddið, náð grillinu, þaðan farið upp á rúðuna og póstinn. Þar stöðvaðist hann vegfarendum á Egilsstöðum til undurs og skemmtunar.

„Mér var ekki hlátur í huga,“ segir Þóra sem átt hafði bílinn í eina viku. „Ég var ekki einu sinni búin að fá skráningarpappírana. Ég var ógeðslega svekkt!“

Kranabíll var fenginn á vettvang sem fjarlægði efri bílinn af þeim neðri.

„Ég held hreinlega að bíllinn sé ónýtur,“ segir Þóra aðspurð um ástand bílsins. Hún ætli í það minnsta ekki að taka við honum aftur. Það sé augljóslega fjárhagslegt tap enda bíllinn með tjónasögu þegar kemur að því að selja hann í framtíðinni.

Þótt Þóra hafi verið svekkt í gær lá vel á henni þegar blaðamaður ræddi við hana í dag. Hún segir í gríni að löngu sé kominn tími á að leysa bílastæðavandann á Egilsstöðum svo ekki þurfi að leggja á tveimur hæðum. Þá nefnir hún að margir hafi velt fyrir sér hvers vegna hún sé með einkanúmerið Miðbær.

„Það halda margir að ég hljóti að vera 101 rotta,“ segir hún hlæjandi. Hið rétta er að hún býr á bænum Efri Miðbæ um fimm kílómetra frá Norðfirði. Hún hefur bílaleigubíl til afnota sem stendur en aðspurð hvernig næsta ferð á Egilsstaði leggist í hana segir hún:

„Ég fer bara á skriðdreka næst.“