Byrlað ólyfjan í miðbæ Reykjavíkur: „Ég var gjörsamlega lömuð“

Litlu munaði að illa færi þegar Sigrúnu Lilju Guðjónsdóttur, hönnuði og rithöfundi, og þremur vinkonum hennar var byrlað ólyfjan í miðbæ Reykjavíkur síðastliðinn föstudag. Sigrún segist vel kunna sér hóf þegar kemur að áfengisdrykkju, og áttaði hún sig því fljótt á að ekki væri allt með felldu þegar henni á einum tímapunkti fór að líða undarlega.

„Ég var með samstarfskonu minni og ég get þakkað guði fyrir að ekki fór verr því við erum tildurlega nýbúnar að kynnast og hún hefði auðveldlega getað afskrifað mig sem dauðadrukkna. En hún sá mig hinsvegar í góðu lagi þar sem ég dansaði við hana og hló og skemmti mér, svo allt í einu þá lamaðist ég og datt niður þar sem ég lág á grúfu á dansgólfinu. Hún hélt fyrst að ég hefði meitt mig en sá svo þegar hún lyfti höfðinu mínu að ég var gjörsamlega lömuð, froðufellandi, sá ekki né gat talað,“skrifar Sigrún Lilja á Facebook síðu sína.

„Aldrei séð mig í ástandi í líkingu við þetta“

Samstarfskona Sigrúnar og eiginmaður hennar báru hana út af staðnum og komu henni til síns heima. „Maðurinn minn var vakinn og fékk hann taugaáfall þegar hann sá mig því hann hefur þekkt mig í 15 ár og aldrei séð mig í ástandi í líkingu við þetta.“

Sigrún átti erfitt með andardrátt og kastaði stöðugt upp og var því tekin ákvörðun um að hringja á sjúkrabíl. „Sjúkraflutningar mennirnir tóku hjartarit til að kanna hjartsláttinn þar sem mikil hætta getur verið á að hann hægist svo mikið og að andardráttur verði svo erfiður að manneskjan sem er byrlað svona mikið hreinlega hætti að anda. Eftir að hafa mónitorað mig í dágóðan tíma og borið mig inní rúm, fylgst með blóðþrýsting, öndun og sjón fékk maðurinn minn það hlutverk að vaka yfir mér.“

Vonar að maðurinn lesi þetta

Sigrún vandar ódæðismanninum ekki kveðjurnar og vill með pistli sínum verða öðrum víti til varnaðar.

„Mig langar að biðja þig að leita þér hjálpar og fá aðstoð. Þrátt fyrir að þú sért andlega veikur og eigir slæma reynslu að baki þá gefur það þér engan rétt á að þú gangir um með þessu hætti, beitir slíku ofbeldi og eyðileggir líka líf annarra sem eru í sakleysi sínu að lyfta sér upp um helgi í góðra vina hópi eftir strembna vinnuviku.“

Færslu Sigrúnar má sjá í heild sinni hér að neðan. 

Innlegg frá Sigrún Lilja Guðjónsdóttir.