Stal bíl, skipti um númeraplötur og ók undir áhrifum amfetamíns

Þingfesting fer fram í dag í Héraðsdómi Reykjavíkur í máli tvítugs manns sem ákærður er fyrir fimm hegningar- og umferðarlagabrot á liðnu ári.

Maðurinn var alls fjórum sinnum stöðvaður af lögreglu frá því í nóvember í fyrra þegar hann var óhæfur og ófær um að stjórna bifreiðinni sem hann ók , „örugglega vegna áhrifa ávana- og fíkniefna og slævandi lyfja“. Í öllum tilfellum mældist umtalsvert magn af amfetamíni í blóð hans ásamt öðrum efnum í snefilmagni, til að mynda MDMA, Nítrazepam, Pregabalin og tetrahýdrókannabínól.

Þá tók hann bíl ófrjálsri hendi í Grafarvogi undir lok síðasta árs og ók henni undir áhrifum amfetamíns. Þá fannst tóbaksblandað kannabis og amfetamín í fórum hans og á var hann alls sviptur ökuréttinum fjórum sinnum á tímabilinu sem um ræðir.

Hinum tvítuga Grafarvogsbúa er einnig gefið að sök að hafa, undir áhrifum amfetamíns og MDMA, skipt um númerplötur á bíl sínum í maí síðastliðnum áður en hann settist undir stýri og ók um Laugardalinn.

Þá var einnig sviptur ökuréttindum fyrir að hafa ekið á 113 kílómetra hraða á klukkustund suður Reykjanesbraut þar sem leyfður hámarkshraði er 80 kílómetrar á klukkustund.

Maðurinn var aldrei stöðvaður tvisvar sinnum á sömu bifreiðinni.