Afar vinsælt Afdalabarn

Í bókaverslun í Mjóddinni var í dag verið að fylla á tómar hillur sem alla jafna hýsa eina mest seldu bók landsins um þessar mundir. Metsölubókin sem um ræðir kom fyrst út fyrir 64 árum síðan. Hún nefnist Afdalabarn og er eftir Guðrúnu frá Lundi.

„Við vorum nokkur sem stóðum að málþingi um Guðrúnu frá Lundi fyrir nokkrum árum. Þangað mættu hátt í fjögurhundruð manns og við hjá Bókaútgáfunni Sæmundi mátum það sem svo að það væri enn eftirspurn eftir verkum Guðrúnar og með þessarri útgáfu höfum við verið að bæta úr brýnni þörf," segir Guðjón  Ragnar Jónasson, starfsmaður Bókaforlagsins Sæmundar, um tilurð endurútgáfunnar.

Viðbrögðin hafa ekki látið á sér standa og bókin tekið sér sess á metsölulistum yfir mest seldu bækur landsins nú nokkrum dögum eftir útgáfuna.

„Sendingarnar seljast upp hver af annarri. Við tókum eftir því að fyrst kom eldra fólk og keypti hana, fólk sem þekkti til verka Guðrúnar en ánægjan með bókina er fljót að spyrjast út til yngra fólks og nú er ég farin að taka niður biðlista," segir Elín Ósk Ásgeirsdóttir, sölumaður í Eymundsson.

Fyrsta bók Guðrúnar, Dalalíf, kom út árið 1946, þegar skáldkonan var 59 ára gömul. Eftir Guðrúnu liggja ellefu rit, þar af meirihlutinn í þónokkrum bindum. Bækur Guðrúnar hafa margar verið ófáanlegar lengi. Dalalíf var endurútgefin síðast árið 2000 en er fyrir löngu uppseld hjá útgefanda.

„Hún lýsir þessu gamla sveitasamfélagi vel og það er notalegur tónn í bókunum hennar sem gerir það að verkum að það er gott og gaman að lesa þær. Sjónarhorn Guðrúnar er ef til vill öðruvísi er karlanna sem voru að skrifa á sama tíma," segir Guðjón.