Þingmaður Sjálfstæðisflokksins vill norskar mjólkurkýr til landsins

Þingmaður Suðurkjördæmis, Unnur Brá Konráðsdóttir vill að flutt verði inn nýtt mjólkurkúakyn til landsins og ætlar að leggja fram frumvarp þess efnis á Alþingi í haust. Hún segist vilja sjá norskar rauðflekkóttar kýr á Íslandi.

Oft hefur verið rætt um að flytja inn nýtt kúakyn inn til landsins í þeim tilgangi að auka mjólkurframleiðsluna því íslensku kýrnar þykja mjólka of lítið. Nú er bændur hvattir til að láta kýrnar mjólka eins mikið og þeir geta og hafa margir hafið byggingar á nýjum fjósum eða eru að byggja við fjósin sín til að fjölga kúnum. Á Alþingi í haust verður lagt fram frumvarp fram þess efnis að kýr frá Noregi verði fluttar inn til landsins. Fyrsti flutningamaður verður Unnur Brá Konráðsdóttir.

„Ég hef lengi verið þeirrar skoðunar að við eigum að flytja inn nýtt kúakyn til þess að leyfa bændum að fá í hendurnar þau tæki og tól, sem gera þeim kleift að efla sína framleiðslu, auka hana og vera þá samkeppnishæfari við erlenda aðila. Ég er að tala um norska kynið, við erum með gögn í höndunum, sem sýna að það er lítil áhætta í þessu fólginn,“ segir Unnur Brá og bætir við.

„Ef við ætlum að efla framleiðsluna í mjólkinni þá eigum við að fara þessa leið“.

En hvaða rök eru fyrir því að fá nýtt mjólkurkúakyn inn í landið ?

„Vegna þess að íslenska kýrin, eins dásamleg og hún er, þá nær hún ekki nægilegri framleiðslu. Við erum að ná þetta að meðaltali fjögurhundruð þúsundum lítrum á Róbót á meðan við erum að horfa upp á í nágrannaþjóðir okkar verða með sjöhundruð þúsund lítra að meðaltali á Róbót, það er himin og haf þarna á milli. Ég tel að það sé rétt að við förum í þessa umræðu, bæði varðandi kjötið og mjólkina, að leyfa íslenskum bændum að fá betri tæki og tól í hendurnar. Síðan er þetta líka þannig með íslensku kúnna að skyldleikaræktun er orðin áhyggjuefni“, segir Unnur Brá.

En heldur hún að norsku kýrnar passi í íslensku fjósin ?

„Við þurfum auðvitað að skoða það, þeir sem eru að byggja, t.d. á Móheiðarhvoli, eru að byggja fjós með stærri básum. Það eru auðvitað gríðarlegar fjárfestingar sem þarf til að byggja upp öflugar rekstareiningar í mjólkinni og menn hafa verið að leggja í það. Ég tel að þess vegna verðum við að grípa til einhverra ráða til að styðja við bændur að efla framleiðsluna,“ segir þingmaðurinn.