Grunur um íkveikju

Lögreglan á höfuðborgarsvæðinu rannsakar tildrög eldsins sem kom upp í húsi við Grettisgötu 62 á tíunda tímanum í morgun. Húsið er á horni Grettisgötu og Barónsstígs í Reykjavík.

Í tilkynningu frá lögreglu kemur fram að grunur leiki á að um íkveikju hafi verið að ræða. Þrír voru innandyra er eldurinn kom upp en sluppu þeir allir með skrekkinn. Nágranni sagði í samtali við Vísi að einn íbúanna hefði flúið út um glugga á annarri hæð.

Málið er í rannsókn en nágrannar segja í samtali við Vísi að mikið partýhald hafi verið í húsinu undanfarið.

„Maður beið bara eftir þessu. Víkingasveitin og lögreglan hafa reglulega þurft að koma hingað og hafa afskipti af fólki í þessu húsi,“ sagði Kristján B. Jónasson, sem rekur bókaforlag við Barónstíg, í samtali við Vísi.