Tvær minniháttar líkamsárásir og engin kynferðisbrot í eyjum

Að sögn varðstjóra hjá lögreglunni í Vestmannaeyjum voru tvær minniháttar líkamsárásir tilkynntar í nótt sem teljast að mestu upplýstar en um var að ræða sama geranda í þeim báðum og gisti hann fangageymslur í nótt. Þá komu fimmtán fíkniefnamál upp síðasta sólahringinn en í öllum tilvikum var um neysluskammta að ræða.

Engin kynferðisbrot hafa verið tilkynnt á Þjóðhátíð til þessa. Hópur sjálfboðaliða á vegum Forvarnarhóps ÍBV er á hátíðinni sem hefur dreift varningi með hvatningarorðum gegn kynferðisbrotum undir merkjum Bleika fílsins. Hópurinn hefur það slagorð að Bleikur fíll sé í stofunni, hann heiti nauðgun og hópurinn ætli að „moka honum út.“ Vakthafandi varðstjóri hjá lögreglunni í Vestmannaeyjum sagðist telja að starf þessa hóps hafi skipt miklu máli. Þá er talið að fjölgun öryggismyndavéla í Herjólfsdal hafi sitt að segja.

Talið er að fjórtán þúsund manns séu á Þjóðhátíð núna en gestum hefur fjölgað jafnt og þétt þegar liðið hefur á helgina en hátíðin mun ná hámarki í kvöld með hinum árlega Brekkusöng sem verður í beinni útsendingu á sjónvarpsstöðinni Bravo og á Bylgjunni í kvöld.

Mörg mál í nótt

Nóttin var erilsöm hjá lögreglunni á Akureyri. Fimmtíu mál komu upp, þó flest vegna hávaða og minni háttar drykkjuláta. Tvö fíkniefnamál komu upp en engin líkamsárás hefur verið kærð. Þá gistu þrír fangageymslur hjá lögreglunni á Akureyri vegna ölvunar og óspekta.

Á Ísafirði fór skemmtanahald almennt vel fram en einn var tekinn fyrir ölvunarakstur og gisti fangageymslur lögreglu í kjölfarið. Nóttin var að öðru leyti róleg að sögn lögreglunnar á Ísafirði og hafa gestir Mýrarboltamótsins verið til fyrirmyndar.

Rétt fyrir klukkan fimm var einn handtekinn í miðbæ Reykjavíkur fyrir að kasta glerflösku af stuttu færi í andlit annars manns en að sögn lögreglu slapp hann furðuvel við alvarlega áverka. Árásarmaðurinn var vistaður fyrir þessa mjög svo hættulega árás og var nokkuð ölvaður.

Fyrr um kvöldið eða um ellefu leytið var tilkynnt um mann sem var að reyna að skemma bifreiðar og reyndist hann vera talsvert ölvaður og búinn að innbyrða örvandi efni í rúma viku og lítið sofið á þeim tíma að sögn lögreglu. Mál hans verður skoðað með morgninum. Að öðru leyti gekk nóttin nokkuð vel í höfuðborginni.