Björgunarsveitarmenn á vakt við Sólheimajökul

Bílastæði sem er næst jökullóni við Sólheimajökul hefur verið lokað og fólki er ráðlagt frá því að fara að eða upp á neðsta hluta jökulsins. Talin er hætta á að það brotni upp úr jöklinum sem risið hefur um einn og hálfan metra á undanförnum dögum.

Ríkislögreglustjóri í samráði við lögreglustjórann á Hvolsvelli ákváðu í gærkvöldi að lýsa yfir óvissustigi við Sólheimajökul. Í tilkynningu segir að undanfarnar vikur hafi aðstæður við sporð Sólheimajökuls breyst hratt. Sporður jökulsins gangi nú fram í jökullón og að undanförnu hafi jakar brotnað framanúr jökulsporðinum og fallið í lónið.

Guðmundur Ingi Ingason varðstjóri hjá lögreglunni á Hvolsvelli segir að við það að jökullinn gangi fram í lónið lyftist sporður jökulsins og nú síðustu daga hafi fremsti hluti hans lyfst um 1,5 metra.

„Það er búið að loka fyrir umferð að neðra bifreiðastæðinu þarna við jökullónið. Þannig að nú leggur fólk lengra frá,“ segir Guðmundur Ingi.

Hins vegar geti fólk farið eftir gönguleið austan meginn við jökulsporðinn án þess að fara inn á hann. Óvissustig verði að minnsta kosti þangað til sérfræðingar séu búinir að kanna aðstæður.

„Almannavarnadeild og lögreglustjóri á Hvolsvelli tóku ákvörðun í gærkvöldi um að setja þetta óvissustig á. Við erum með vakt þarna í dag. Björgunarsveitin Víkverji í Vík er með tvo menn þarna til að leiðbeina fólki,“ segir Guðmundur Ingi.

Menn telji réttast að taka enga áhættu á meðan ekki sé búið að kanna málið frekar sem gert verði á næstu dögum.

„Ef hann brestur veit maður aldrei hvað getur gerst. Það er náttúrlega erfitt ef þetta fer allt saman af stað. Þá gætu hlutirnir gerst fljótt og þá kemur kannski flóð í kjölfarið, fljóðbylgja. Það gæti brotnað upp úr honum og það eru farin að heyrast hljóð í honum,“ segir Guðmundur Ingi Ingason lögregluvarðstjóri á Hvolsvelli.