Dregur úr stuðningi við ríkisstjórnina

Stuðningur við ríkisstjórnina mælist 36,2% í nýjustu könnun MMR en mældist 38,0% í síðustu mælingu og 36,8,8% í lok maí s.l. Lítil breyting er á fylgi flokkanna frá síðustu könnun fyrirtækisins, sem gerð var í lok júní. Helsta breytingin er sú að fylgi Bjartrar framtíðar minnkar um 2,6% og fylgi Framsóknarflokks eykst um 2,3%. Fylgi annarra flokka breytist um innan við eitt prósentustig.

MMR kannaði fylgi stjórnmálaflokka og stuðning við ríkisstjórnina (stjórn Framsóknarflokks og Sjálfstæðisflokks) á tímabilinu 28. til 31. júlí 2014. 

Á vef MMR kemur fram að fylgi Sjálfstæðisflokksins mældist nú 24,1%, borið saman við 25,0% í síðustu könnun. Fylgi Bjartrar framtíðar mældist nú 19,2%, borið saman við 21,8% í síðustu könnun. Fylgi Samfylkingarinnar mældist nú 17,0% borið saman við 16,5% í síðustu könnun. Fylgi Framsóknarflokksins mældist nú 11,8%, borið saman við 9,5% í síðustu könnun. Vinstri-græn mældust nú með 11,6% fylgi, borið saman við 11,4% í síðustu könnun og fylgi Pírata mældist nú 9,6%, borið saman við 8,3% í síðustu könnun. Fylgi annarra flokka mældist undir 2%.

Lagðar voru allt að þrjár spurningar fyrir svarendur um stuðning þeirra við stjórnmálaflokka. Allir voru spurðir spurningar 1: „Ef kosið yrði til Alþingis í dag, hvaða flokk myndir þú kjósa?“. Þeir sem svöruðu „Veit ekki/óákveðin(n)“ við spurningu 1 voru því næst spurðir spurningar 2: „En hvaða flokkur yrði líklegast fyrir valinu?“. Ef aftur var svarað „Veit ekki/óákveðin(n)“ þá voru þátttakendur að lokum spurðir spurningar 3: „Hvort er líklegra að þú kysir Sjálfstæðisflokkinn eða einhvern hinna flokkanna?“. Fjölda þeirra sem svaraði "einhvern hinna" í spurningu 3 var skipt milli annarra flokka en Sjáflstæðisflokksins í sama hlutfalli og fylgi þeirra var skv. spurningum 1 og 2. Samtals voru 80,5% sem gáfu upp afstöðu til flokka, aðrir kváðust óákveðnir (5,3%), myndu skila auðu (5,7%), myndu ekki kjósa (2,0%) eða vildu ekki gefa upp afstöðu sína (6,5%).

Í úrtakinu voru einstaklingar 18 ára og eldri úr hópi álitsgjafa MMR, valdir af handahófi. Alls svöruðu 937 einstaklingar könnuninni.