Pape: Það er rasismi á Íslandi

Pape Mamadou Faye er í viðtali í sunnudagsblaði Morgunblaðsins. Þar talar hann m.a. um kynþáttaníð sem hann hefur þurft að þola hér á landi og viðskilnaðinn við Fylki.

„Það er rasismi á Íslandi og löngu tímabært að við horfumst í augu við það vandamál. Ég hef hins vegar aldrei látið mót­læti af þessu tagi brjóta mig niður, þvert á móti hef ég notað það sem hvatningu og til að standa mig ennþá betur,“ sagði Pape í Morgunblaðinu.

Pape flutti til Íslands frá Senegal, þar sem hann er fæddur, ellefu ára gamall. Hann segir frá því hvernig hann hafi byrjað að upplifa fordóma í sinn gerð tveimur til þremur árum seinna.

 

„Þegar ég var þrettán eða fjórtán ára fór að bera á fordómum í minn garð. Inni á vellinum kom fyrir að andstæðingar mínir fóru yfir strikið og í áhorfendastúkunni létu foreldrar og aðrir áhorfendur ekki sitt eftir liggja.

„Það var mjög sárt að upplifa þetta en í miðjum leik var lítið sem ég gat gert. Kári Jónasson þjálfari (hjá Fylki) tók hins vegar upp hanskann fyrir mig á hliðarlínunni og lét áhorfendur gjarnan hafa það óþvegið. Ég er honum þakklátur fyrir það.“

Pape var rekinn frá uppeldisfélagi sínu, Fylki árið 2010 og gerir hann það upp í blaðinu.

„Þetta var agabrot. Mér urðu á mistök. Gerði hlut sem ég átti ekki að gera. Ég sá strax eftir því en ef til vill var ég ekki nógu auðmjúkur í minni iðrun á þessum tíma. Ég myndi aldrei gera svona lagað í dag.

„Eigi að síður fannst mér þá og finnst enn að Fylkir hefði getað leyst málið með öðrum hætti en að reka mig úr félaginu. Auðvitað áttu þeir að refsa mér en hefðu getað gert það með því að setja mig í bann eða lána mig til annars félags. Það var fullgróft að reka mig. Ég var bara krakki, nítján ára, og Fylkir var mín önnur fjölskylda.

„Menn ákváðu hins vegar að fara þessa leið og við því er ekkert að segja. Það breytir ekki því að mér þykir ennþá mjög vænt um Fylki. Ég mun alltaf geyma félagið í hjarta mér,“ sagði Pape meðal annars.