Gefa mat á Facebook

Meðlimir Facebook-hópsins „Gefins, allt gefins!" tóku sig saman í gær og morgun og gáfu mat til þeirra sem eru hjálpar þurfi.

Hópurinn „Gefins, allt gefins!" var stofnaður fyrir rúmu ári síðan, og inniheldur tæplega sautján þúsund manns. Síðan er svæði fyrir fólk til að gefa hluti frá sér endurgjaldslaust. Margir gefa notuð húsgögn, föt og ýmisleg leikföng eða bækur.

Allt að tíu manns birtu ljósmyndir af ónýttum matarbirgðum sem höfðu jafnvel legið í heilt ár í frystikistu. Fannst þeim hyggilegra að gefa hann þeim sem þurfa á matnum að halda. Margir svöruðu boðinu og þáðu matargjöf.

Í kjölfarið var svo sérstakur hópur stofnaður með það í huga að fólk deili mat með hverju öðru. Hópurinn sá heitir einfaldlega Matargjafir.

Kolbrún Sara Aðalsteinsdóttir er ein þeirra sem gaf frá sér miklar matarbirgðir.

„Ég veit hvernig það er að eiga ekki mat í lok mánaðarins, og sérstaklega núna þegar fólk er að borga skatt, þá eiga ekkert margir mikið eftir," segir Kolbrún. „Ég ákvað að kíkja hvað ég ætti til og hvort ég gæti hjálpað einhverjum."

Aðspurð segist Kolbrún halda að matargjafir Mæðrastyrksnefndar nægi ekki til að halda uppi þeim sem þurfa hjálp. „Ég þekki marga sem þurfa að styðjast við hjálp frá Mæðrastyrksnefnd en eiga samt lítið sem ekkert."

Kolbrún vill hvetja aðra til að gera slíkt hið sama.

„Kíkið í eldhúsið ykkar. Það er rosalega oft sem maður á eitthvað sem maður er ekkert að fara að nota, hlutir sem maður kaupir sem maður á eftir að henda. Ég vil endilega hvetja fólk til að kíkja í eldhúsið sitt."

Ef smellt er á tengilinn að ofan er hægt að sjá síðu hópsins, en sé notandi ekki meðlimur getur hann ómögulega séð innlegg hópsins þar eð hann er stilltur sem lokaður.