Kúlan situr enn föst í Panda

„Hann Pandi okkar er einn yndislegasti kisi sem ég veit um, finnst ógurlega gaman að leika við þá sem hann þekkir og á það til að fara í algert kelistuð. Þá er ekkert annað í stöðunni en að klappa honum, enda stór og sterkur strákur.“ Svona lýsir Vífill Garðarsson ketti sínum, Panda, sem liggur nú milli heims og helju eftir að skotið var á hann með krafmiklum loftriffli við Kársnes í Kópavogi á sunnudag.

Það var nágranni Vífils sem kom að Panda í bílskúrnum sínum en þangað leggur kötturinn oft leið sína. Í þetta skiptið hljóp hann þó ekki á móti Vífli þegar hann kom að vitja hans. „Hann lá bara kjurr þannig að ég þurfti að taka hann upp og halda á honum heim. Ég lagði hann frá mér og þá gat hann ekki staðið í lappirnar. Þá var bara að bruna með hann á dýraspítalann.“

Þegar þangað var komið var Pandi skoðaður og í fyrstu hélt læknirinn að keyrt hafi verið á hann. Röntgen myndataka leiddi þó annað í ljós. Í miðju brjóstholi hans var loftbyssukúlan, undir hjartanu og á milli lungna Panda. Hún situr þar enn, fjórum dögum síðar, því talið er að ekki sé hægt að fjarlægja hana án þess að Pandi hljóti mikinn skaða af.

Frá því að skotið var á hann hefur Pandi ekkert lagt sér til munns og hefur hann horast mikið að sögn Vífils. „Hann borðaði eitthvað smávægilegt hjá dýralækninum en annars hefur hann verið algjörlega lystarlaus. Hann er ekki nema skugginn af sjálfum,“ segir hann og bætir við að ef hann hefur ekki tekið við sér á föstudaginn verði honum leyft að fara.

Sá er skaut á Panda er enn ófundinn en Vífill deildi mynd af honum sem áminning til allra þeirra sem  gera sér leik að því að vinna dýrum mein.

„Þetta hefur ekki verið neitt leikfang. Ég meina, kúlan situr enn í honum og hún þurfti að smjúga í gegnum heilan helling. Þetta hefur verið alvöru loftrifill sem notaður hefur verið á Panda.“ Vífill biðlar til allra þeirra sem kunna eitthvað að vita um málið, eða kunna að koma að svipuðum tilfellum í framtíðinni, að hafa samband við lögregluna

Færslu hans má sjá hér að neðan en á annað hundrað dýravina hafa nú þegar deilt henni.

Post by Vífill Garðarsson.