Lloris: Hugsum ekki um verkfallið 2010

Hugo Lloris, markvörður Tottenham og franska landsliðsins, segir að verkfallið sem leikmenn Frakklands fóru í á HM 2010 sé það síðasta sem þeir hugsi um núna í Brasilíu.

Eftir að RaymondDomenech, þáverandi þjálfari Frakklands, sendi NicolasAnelka heim vegna orðbragðs leikmannsins í sinn garð neituðu Frakkarnir að æfa og fóru í verkfall.

Þeir sátu inn í rútu og neituðu að fara út á æfingavöll en tugir ljósmyndara og fréttamanna stóðu á milli rútunnar og æfingasvæðisins þar sem Domenech og hans menn biðu. Frakkland komst ekki upp úr riðli og fór heim með skottið á milli lappanna.

„Ef ég á að vera heiðarlegur þá hugsum við ekki einu sini um hvað gerðist 2010. Við erum bara að einbeita okkur að þessari heimsmeistarakeppni. Það sem gerðist fyrir fjórum árum á heima í fortíðinni,“ sagði markvörðurinn við blaðamenn í Salvador í gær.

Frakkar mæta Svisslendingum í mikilvægum leik í E-riðli á morgun en með sigri tryggir Frakkland sig áfram í 16 liða úrslitin.

„Við mætum mjög sterku liði á morgun og verðum að spila vel til að vinna,“ sagði Hugo Lloris.