Messi afgreiddi Íran

Argentína er komið í 16 liða úrslit heimsmeistarakeppninnar í fótbolta í Brasilíu eftir 1-0 sigur á Íran. Lionel Messi skoraði sigurmarkið í uppbótartíma.

Eins og við var að búast var Argentína mikið meira með boltann en liðið átti í stökustu vandræðum með að búa sér til færi gegn þéttri og vel skipulagðri vörn Íran.

Íran fékk góð færi til að skora í seinni hálfleik og hefði liðið að auki átt að fá vítaspyrnu.

Sóknarleikur Argentínu var oft hægur og fyrirsjáanlegur og varð liðið að sætta sig við nokkur fín skotfæri í leiknum. Messi þarf bara eitt slíkt.

Messi fékk pláss fyrir utan vítateiginn hægra megin, lagði boltann fyrir vinstri fótinn og nýtti sér að enginn varnarmaður Íran lokaði á hann og smellti boltanum í netið þegar allt virtist stefna í annað markalaust jafntefli Íran í keppninni.

Argentína er komin áfram með sex stig eftir tvo leiki. Íran er með stig líkt og Nígería og Bosnía án stiga en Nígería og Bosnía mætast klukkan 22 í kvöld.