Van Persie kemur Rooney til varnar

Robin van Persie sem farið hefur á kostum í fyrstu tveimur leikjum Hollands í heimsmeistarakeppninni í fótbolta í Brasilíu segir Wayne Rooney liðsfélaga sinn hjá Manchester United ekki eiga vægðarlausa gagnrýni enskra fjölmiðla skilið.

Van Persie segir ekki við Rooney að sakast þó England sé fallið úr leik eftir tvær umferðir í riðlakeppni HM.

Rooney skoraði fyrsta mark sitt á HM þegar England tapaði 2-1 gegn Úrúgvæ á fimmtudaginn en áður hafði liðið tapað með sömu markatölu gegn Ítalíu.

„Það er ekki við Wayne að sakast, hann gaf allt sitt fyrir þjóð sína. Það er ekki sanngjarnt að gagnrýna hann svona mikið,“ sagði Van Persie.

„Hann er undir mikilli pressu og þannig hefur það verið frá því að hann lék sinn fyrsta leik. Mér fannst hann leika vel. Þú getur ekki kennt honum um fyrir að skora eitt mark, berjast af hörku og rétt klikka úr þremur færum.

„Ég hef oft sagt það, Wayne var ein af ástæðunum fyrir því að ég kom til Manchester United. Ég hef aldrei séð eftir því að hafa sagt það því að æfa og að leika með honum hefur sýnt mér að hann er heimsklassa leikmaður. Hann er frábær leikmaður og frábær markaskorari,“ sagði Robin van Persie um liðsfélaga sinn hjá Manchester United.