Pjanic: Skiptir alla þjóðina máli

Miðjumaðurinn Miralem Pjanic lykilmaður Bosníu og Hersegóvínu í heimsmeistarakeppninni í fótbolta í Brasilíu segir leikinn í kvöld gegn Nígeríu skipta alla þjóðina miklu máli.

Bosnía tekur í fyrsta sinn þátt á HM eftir að þjóðin fékk sjálfstæði og öll þjóðin fylgist vel með framgöngu liðsins sem tapaði 2-1 fyrir Argentínu í fyrsta leik.

„Þetta er mikilvægur leikur, lykilleikur,“ sagði Pjanic á blaðamannafundi fyrir leikinn í kvöld.

„Við erum klárir í slaginn. Við getum varla beðið. Við vitum hve mikilvægur leikurinn er. Ef við töpum erum við úr leik. Það munum við ekki láta gerast. Við munum berjast. Þetta er ekki bara mikilvægur leikur fyrir liðið heldur allt landið.

„Við erum með leikmenn sem vilja koma landsliðinu á toppinn. Ég spila með landsliðinu til að vinna. Ég er aldrei ánægður eftir tap.

„Þessi HM væri mikil vonbrigði ef við kæmumst ekki upp úr riðlinum. Hugarfarið er rétt. Við erum aldrei saddir. Við vorum vonsviknir eftir tapið gegn liði Argentínu sem var betra en við. Þetta er eina leiðin til að bæta sig,“ sagði Pjanic.

Leikur Bosníu og Nígeríu er í beinni útsendingu Stöðvar 2 Sport 2 klukkan 22:00. Upphitun hefst með HM Messunni klukkan 21:10.