"Ég bít alla þýska leikmenn ef ég þarf“

Spéfuglinn Will Ferrell mætti á bar í Recife í Brasilíu í gærkvöldi þar sem stuðningsmenn bandaríska landsliðsins komu saman.

Bandaríkin keppa við Þýskaland á heimsmeistaramótinu í knattspyrnu í dag og brá Will sér í karakter sem knattspyrnumaður. Var honum lýst sem leynivopni landsliðsins. Will brá sér uppá svið og hélt sprenghlægilega ræðu.

„Það er mikill heiður fyrir mig að spila á morgun. Ég ætla ekki að ljúga að ykkur, ég er ekki í mínu besta formi. Ég er ekki í fótboltaformi núna en ég ætla að gera mitt besta til að fanga anda bandaríska liðsins,“ sagði Will.

„Ef leikurinn er jafn ætla ég að bíta!“ sagði Will ennfremur og vísaði í atvikið sem átti sér stað í leik Úrúgvæ og Ítalíu þar sem Luis Suarez beit Giorgio Chiellini.

„Ég bít andstæðinginn! Ég bít þá! Ég bít alla þýska leikmenn ef ég þarf.“

Myndband af ræðu spéfuglsins fylgir fréttinni.