"Notum allar lóðir við höfnina undir atvinnulífið en ekki undir íbúðabyggð“

„Við megum ekki láta skjótfenginn gróða ráða ferðinni. Borgaryfirvöld eiga að hugsa um hvað er íbúum borgarinnar fyrir bestu og borginni en ekki taka skjótfenginn gróða af lóðarsölu fram yfir menningarleg verðmæti og fjölbreytt atvinnulíf og menningarlíf.“ Þetta segir Guðmundur Kristjánsson útgerðarmaður, oftar en ekki kenndur við Brim, í aðsendri grein sem birtist í Fréttablaðinu í gær undir yfirskriftinni Eitt mesta skipulagsslys í Reykjavík í uppsiglingu?

Þar vandar hann borgaryfirvöldum ekki kveðjurnar og sakar þau um að leggja niður Reykjavíkurhöfn í sinni mynd sem hann segir hafa verið eitt mesta atvinnusvæði og menningarstaður Reykjavíkur alla tíð. Fyrirhugað er að gera hafnarsvæðið að íbúðabyggð.



„Aðilar sem hafa haft sína atvinnu við höfnina síðustu áratugina og sitt lifibrauð hafa ítrekað bent borgaryfirvöldum, hafnaryfirvöldum og skipulagsyfirvöldum á, að það gangi ekki upp að taka atvinnusvæðið undir íbúðabyggð en segja svo í hinu orðinu að höfnin eigi að vera áfram í óbreyttri mynd,“ segir Guðmundur og bætir við að reynsla erlendis frá hafi sýnt að íbúðabyggð þar sem byggt var við atvinnuhöfn hafi orðið til þess að hefðbundin hafnarstarfsemi lagðist þar niður.

Vísar hann þar í erlenda sérfræðinga og segir Guðmundur að reynsla þeirri sýni að það fer vel saman að hafa hefðbundið atvinnulíf við höfnina með ferðaiðnaðinum, listum og menningarstarfsemi, veitingahúsum, kvikmyndagerð, skemmtistöðum, tækni- og listaskólum en það má alls ekki setja íbúðabyggð á svæðið.

„Við þurfum ekki annað en að fara til Hafnarfjarðar og sjá hvaða áhrif íbúðabyggð á Norðurbakkanum þar hefur haft á hafnarlífið; það eru engin skip þeim megin eða atvinnulíf,“ bætir hann við.

„Ein helstu verðmæti Reykjavíkurhafnar eru einmitt fólgin í því að allir geta farið niður á höfn og skoðað sig þar um óáreittir og virt fyrir sér mannlífið, atvinnulífið, skipin koma og fara, andað að sér sjávarlofti og fengið kraftinn úr hafnarlífinu,“ segir Guðmundur undir lok greinnar.

„Við eigum að skipuleggja höfnina þannig að við byggjum á núverandi grunni og eflum atvinnulífið við höfnina og notum allar lóðir við höfnina undir atvinnulífið en ekki undir íbúðabyggð“

Grein Guðmundar í heild sinni má nálgast hér að neðan.