Tíu Grikkir vörðust með kjafti og klóm

Japan og Grikkland eiga bæði enn möguleika á því að komast í sextán liða úrslit á HM eftir markalaust jafntefli í kvöld.

Bæði lið eru með eitt stig en Kólumbía er á toppi riðilsins með sex stig og Fílabeinsströndin er með fjögur. Japan spilar við Kólumbíu í lokaumferðinni á meðan Grikkir mæta liði Fílabeinsstrandarinnar.

Fyrri hálfleikur var tilþrifalítill en sjö mínútum fyrir hlé dró til tíðinda er Grikkinn Kostas Katsouranis var rekinn af velli.

Hann fékk þá sitt annað gula spjald á ellefu mínútum og þar með hið rauða.

Grikkir þurftu þar með að leggjast í skotgrafirnar og verjast. Það kunna þeir vel enda með áralanga reynslu af varnarleik.

Japanir reyndu að sækja af öllum mætti en gekk afar illa að opna sterkan varnarmúr Grikkjanna.

Fór líka svo á endanum að hvorugu liðinu tókst að skora.