Stúlkan sem greindist með E.coli komin heim

Stúlkan sem veiktist af E.coli-bakteríu í byrjun mars mánaðar er komin til síns heima á Akureyri. Nýru stúlkunnar, sem er tveggja ára gömul, voru hætt að virka og var hún um tíma í öndunarvél og blóðskilun. Vikudagur greinir frá þessu.

Amma stúlkunnar sagði í samtali við Vikudag að nýru hennar séu farin að starfa um fimmtíu prósent. Hún fari reglulega á Sjúkrahúsið á Akureyri í blóðprufur og fylgst sé með henni þar. Þá sé hún í sjúkraþjálfun en þetta muni taka tíma.

Flytja þurfti stúlkuna með sjúkraflugi til Reykjavíkur og var hún undir ströngu eftirliti á Landspítalanum í nokkrar vikur. Hún var meðhöndluð á gjörgæsludeild Landspítalans með blæðandi garnasýkingu af völdum E.coli bakteríu, sem myndar eiturefni.

Rannsókn málsins hefur beinst að því að finna fleiri tilfelli og frá hvaða matvælum sýkingin kann að hafa borist. Sýkingin er meðal annars að finna í nautgripum og afurðum þeirra. Þá er ekki talið að matur á leikskóla stúlkunnar, né á heimili hennar hafi orsakað veikindin.

E.coli-bakterían framleiðir ákveðna tegund eiturefnis að sögn Guðrúnar Sigmundsdóttur, yfirlæknis á sóttvarnasviði hjá embætti Landslæknis. Eiturefnið getur valdið slæmum veikindum og þá sérstaklega hjá ungum börnum.  Þá segir hún að þessi baktería greinist í tvö til þrjú skipti á ári og þetta tilfelli virðist eitt af þeim.

Í tilviki stúlkunnar var hennar nánasta umhverfi verið rannsakað í þaula í samstarfi við Matvælastofnun og heilbrigðisfulltrúa og lækna á  Akureyri. Ekkert hafi fundist sem gat skýrt hvers vegna hún smitaðist.

Í tilkynningu landlæknisembættisins kemur fram að til að draga úr líkum á smiti sé mikilvægt að hreinlætis sé gætt, með því að þvo sér oft um hendur, tryggja fullnægjandi hitun matvæla þar sem það á við, koma í veg fyrir krossmengun matvæla og skola vel grænmeti.