Öllum starfsmönnum Leikfélags Akureyrar sagt upp

Öllum starfsmönnum Leikfélags Akureyrar verður sagt upp störfum í dag vegna fjárhagsvanda félagsins. Þetta kemur fram á vef Vikudags.

Félagið glímir við fjárhagsvanda og er orðrómur um að sameina eigi rekstur leikfélagsins, Sinfoníuhljómsveitar Norðurlands og Menningarhússins Hofs. Ragnheiður Skúladóttir, leikhússtjóri, segir í samtali við Vikudag að félagið hafi fengið 54 milljón króna lán frá Akureyrarbæ fyrir tveimur árum, en hafi sú skuld átt að greiðast of hratt niður og það hafi verið of stór biti að taka. Tíu milljónir króna eru eftir af láninu.

Leikfélagið fór á þess leit við bæjarráð Akureyrarbæjar að samningur félagsins við bæinn verði tekinn til endurskoðunar. Þegar bæjarráð hafnaði þeirri beiðni varð ljóst að gera þyrfti hlé á starfseminni.

„Þar sem bæjarráð hefur hafnað þessum hugmyndum LA er ljóst að, að óbreyttu, verður ekki  atvinnustarfsemi í Samkomuhúsinu næsta vetur og þar með ekki rekinn leiklistarskóli enda er sú starfsemi algjörlega háð starfsemi atvinnuleikhúss,“ segir í tilkynningu félagsins.