Fimm sérfræðingar fengnir að utan vegna máls Annþórs og Barkar

Héraðsdómur Suðurlands hefur fallist á kröfu verjenda Annþórs Kristjáns Karlssonar og Barkar Birgissonar um að dómkveða tvo erlenda sérfræðinga í máli ákæruvaldsins gegn þeim. Þrír aðrir erlendir sérfræðingar hafa einnig verið dómkvaddir í tengslum við við málið.

Þetta er úrskurður Héraðsdóm Suðurlands þar sem málið var tekið fyrir í dag.

Annþór og Börkur sæta ákæru fyrir að hafa ráðist á samfanga sinn, Sigurð Hólm Sigurðsson, á Litla-Hrauni í maí árið 2012 með þeim afleiðingum að milta hans rofnaði og hann lést í kjölfarið. Þeir neita sök.

Verjendur Annþórs Kristjáns Karlssonar og Barkar Birgissonar treystu ekki að íslenskir sérfræðingar gættu hlutlægni í málinu. Þeir fóru fram á yfir- og endurmat tveggja þýskra sérfræðinga á rannsóknarniðurstöðum Þóru Steffensen, réttarmeinafræðings, varðandi réttarmeinafræðina.

„Þeir tveir Þjóðverjar sem við höfum fundið til voru í dag dómkvaddir og verða þeir yfirmatsmenn á mati Þóru Steffensen,“ segir Hólmgeir Elías Flosason, lögmaður Annþórs Karlssonar.

„Sækjandi tók sér frest um það hvort hann ætlaði sér að kæra úrskurðinn til Hæstaréttar. Varðandi atferlisfræðinga þá var stungið upp á því að fá þrjá atferlisfræðinga sem eru frá Noregi, Svíþjóð og Bretlandi og voru þeir einnig allir dómkvaddir. Sækjandi gerði ekki athugasemdir við það og því eru þeir komnir inn í málið,“ segir Hólmgeir.

Atferlisfræðingarnir verða yfirmatsmenn á rannsóknarniðurstöðu Gísla Guðjónssonar og Jónasar Friðriks Sigurðssonar sem áður voru fengnir til að gefa álit á myndbandsupptöku frá Litla-Hrauni.