Innlent

ESB tilbúið þegar og ef Ísland vill halda viðræðum áfram

Heimir Már Pétursson skrifar

Matthias Brinkmann sendiherra Evrópusambandsins á Íslandi segir sambandið reiðubúið að halda aðildarviðræðum við Ísland áfram þegar og ef Ísland tæki ákvörðun um það. Ákvörðun um næstu skref í málinu sé alfarið Íslands.

Sendiherrann segir í svari við fyrirspurn fréttastofu að ákvörðun um hvað gerist varðandi framhald viðræðna Íslands og Evrópusambandsins sé algerlega Íslands. Evrópusambandið skipti sér ekki af ákvörðunarferlinu á Íslandi. Evrópusambandið yrði tilbúið til að halda aðildarviðræðunum áfram, þegar og ef Ísland tæki ákvörðun um það, en viðurkenni hvaða ákvörðun sem Ísland kunni að taka í þessu máli.

José Manuel Barroso forseti Evrópusambandsins sagði eftir fund með Sigmundi Davíð Gunnlaugssyni forsætisráðherra í Brussel hinn 16. júlí í fyrra að þeir hefðu átt uppbyggilegan fund.

„Ég vil tala skýrt: Framkvæmdastjórnin virðir ákvörðun ríkisstjórnarinnar hvað varðar aðildarferlið. Við hlökkum til að fá útskýringar á gildi aðildarumsóknar Íslands að loknu mati íslenska þingsins á stöðu aðildarviðræðnanna sem mun fara fram í haust (2013). Það er í þágu ESB og Íslands að ákvörðunin er tekin að vel ígrunduðu máli og með hlutlægum og gagnsæjum hætti. En klukkan tifar og það er í þágu okkar allra að þessi ákvörðun sé tekin án frekari tafa,” sagði Barroso.

Þetta var í júlí í fyrra en í ályktun Evrópuþingsins frá 7. janúar á þessu ári segir að Evrópuþingið voni að skýrsla Alþingis liggi fyrir sem fyrst og bíði ákvörðunar Íslands, m.a. um það hvort haldin verði þjóðaratkvæðagreiðsla um áframhald viðræðna.

Við þetta tækifæri sagði Stefan Fule stækkunarstjóri ESB á Evrópuþinginu að íslensk stjórnvöld hefðu ákveðið að setja viðræðurnar í hlé og boltinn væri hjá þeim um næstu skref. Framkvæmdastjórn sambandsins væri hins vegar viljug og tilbúin til að ljúka viðræðuferlinu og þess fullviss að hægt væri að ná niðurstöðu sem væri báðum aðilum í hag.

Hér er svar Matthias Brinkmann sendiherra eins og það barst fréttastofu á ensku:

The decision on what should happen regarding the future of Iceland's membership application is entirely up to Iceland. The EU does not interfere in the Icelandic decision-making process. The EU would be ready to continue the accession negotiations if and when Iceland decides to do so, but will acknowledge whatever decision Iceland takes in the matter.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.