Gunnar Nelson aðalandlit Tenacity í Evrópu

Bardagakappinn Gunnar Nelson er orðinn aðalandlit fatamerkisins Tenacity í Evrópu, sem er systurmerki JACO í Bandaríkjunum. Nú er Gunnar staddur í Þýskalandi á ISPO kynningunni þar sem hann er að kynna vörur frá Tenacity.

Undanfarið hefur hann þó verið við æfingar í Írlandi fyrir bardaga sinn í UFC þann 8. mars næstkomandi í London. Þá mun Gunnar berjast við Rússann Omari Akhmedov.

„Undirbúningurinn gengur mjög vel. Ég var að koma frá Dublin þar sem ég var að æfa með nokkrum af æfingafélögum mínum. Meðal annars Cathal Pendred, Connor McGregor, John Kavanagh þjálfara mínum og fleirum,“ segir Gunnar. Þá hefur hann verið að einbeita sér að standandi bardagatækni og þá sérstaklega boxi.

Aðspurður hvort hann sé búinn að ná sér á hnémeiðslum sem hann varð fyrir fyrr á árinu segir Gunnar: „Það er langt síðan, ég er búinn að vera hundrað prósent í marga mánuði.“