Lögreglan varar við fjársvikum

Óprúttnir aðilar virðast hafa komist inn í tölvupóstsamskipti íslenskra fyrirtækja sem eiga í viðskiptum milli landa. Lögreglunni á höfuðborgarsvæðinu hefur undanfarið borist kærur og ábendingar vegna fjársvika þeirra.

Í nokkrum tilfellum hefur þeim tekist að breyta greiðslufyrirmælum vegna uppgjöra á viðskiptareikningum milli aðila og beina þannig greiðslum á reikninga óviðkomandi. Þetta kemur fram í tilkynningu frá lögreglu.

Lögregla brýnir fyrir þeim sem standa í viðskiptum milli landa að hafa varann á sér þegar skyndilegar breytingar verða á greiðslufyrirmælum viðskiptavina og reyna að afla staðfestingar á slíkum breytingum með öðrum hætti en tölvupósti.