Kveikt á Stefnumótastaurnum í Keflavík

Kveikt var á Stefnumótastaurnum á horni Hafnargötu og Tjarnargötu á Ljósanótt í Keflavík í dag. Staurinn á rætur sínar að rekja til lags Magnúsar Kjartanssonar, Skólaball, sem hljómsveitin Brimkló flutti á sínum tíma.

Í tilkynningu segir að sagan segir að Magnús og vinur hans hafi verið skotnir í sömu stelpunni á skólaárum sínum eins og gengur og gerist.

„Á skólaballi sá Magnús á eftir vininum og stúlkunni læðast í burtu en sjálfur gekk hann særður út í nóttina. Hann kom sér síðan fyrir í skoti nálægt heimili hennar og beið átekta. Stúlkan birtist loks en var snöktandi og hallaði sér upp að ljósastaurnum umrædda. Magnús tók þá á sig rögg, fór til stúlkunnar og huggaði og til að gera langa sögu stutta þá eru þau Magnús hjón enn þann dag í dag“

Nú hefur verið settur upp stór og mikill tréljósastaur frá þessum árum. Á honum má lesa um tilurð lagsins og texta og einnig er hægt að hlusta á brot úr laginu með því að ýta á hnapp.

Í tilkynningunni segir að Magnús hafi gaman af uppátækinu og hann vonist jafnvel til þess að þetta verði staður þar sem fólk fari á skeljarnar og beri upp bónorðið.

Sönghópur Suðunesja tók lagið við tilefnið en Magnús stýrir honum. Þá tók Björgvin Halldórsson einnig lagið við góðar undirtektir viðstaddra.