Nýr upplýsingabæklingur um ADHD á pólsku

ADHD samtökin hafa nú látið þýða á pólsku, bækling með grunnupplýsingum um ADHD.

Björk Þórarinsdóttir, formaður ADHD samtakanna og Þröstur Emilsson, framkvæmdastjóri samtakanna afhentu Lech Mastalerz, sendifulltrúi Póllands á Íslandi fyrsta eintakið í sendiráði Póllands í morgun.

Pólverjar eru sem kunnugt er fjölmennasti innflytjendahópurinn á Íslandi. Á tíunda þúsund Pólverjar eru hér á landi eða um 3% landsmanna. Þar af eru að minnsta kosti 1.500 börn.

Upplýsingabæklingnum verður dreift á heilsugæslustöðvar, þjónustumiðstöðvar og félagsþjónustur sveitarfélaga um allt land og víðar. Þá verður bæklingurinn fáanlegur á rafrænu formi á vefsíðu ADHD samtakanna og vef pólska sendiráðsins.

Markmið ADHD samtakanna er að börn og fullorðnir með athyglisbrest, ofvirkni og skyldar raskanir mæti skilningi alls staðar í samfélaginu.

Þeir fái þjónustu sem stuðlar að félagslegri aðlögun þeirra, möguleikum í námi, starfi og almennt bættum lífsgæðum.

Ef yfirfærðar eru erlendar faraldsfræðilegar rannsóknir á íslenskt þýði má gera ráð fyrir því að um 10.000 fullorðnir og 6.000 börn á Íslandi séu með ADHD.