„Þessi Dracula-mynd hjálpar varðandi útlönd og ég hef fengið tilboð í kjölfarið“

„Þessi Dracula-mynd hjálpar varðandi útlönd og ég hef fengið tilboð í kjölfarið sem er náttúrulega frábært,“ segir leikarinn Þorvaldur Davíð Kristjánsson í viðtali við Síðdegisútvarpið á Rás 2. Hann segist vera í viðræðum um að leika í tveimur kvikmyndum erlendis og að hlutverkin séu spennandi þó myndirnar séu ekki jafnstórar og Dracula Untold sem frumsýnd var fyrir stuttu.

„Þetta er í hendi en samt ekki í hendi,“ bætir Þorvaldur við en ýmislegt getur breyst í hinum stóra kvikmyndabransa.

Þorvaldur leikur morðingjann Bright Eyes í kvikmyndinni Dracula Untold sem frumsýnd var fyrir stuttu. Myndin hefur fengið misjafna dóma en hefur samt sem áður náð að trekkja vel að í kvikmyndahúsum um allan heim. Myndin var tekin upp í Belfast á Norður-Írlandi og voru dagarnir langir að sögn Þorvaldar. Stundum fékk hann frí frá tökum en þá æfði hann bardagalistir í yfirgefinni vöruskemmu.

„Þar var ég píndur með tveimur trésverðum á hverjum einasta morgni og látinn æfa einhverjar skylmingar,“ segir leikarinn sem fannst áhugaverðast við ferlið að æfa skylmingar og vinna í kuldanum í Belfast. 

Hann lýsir því einnig hvernig hann fékk hlutverkið í myndinni sem var langt og strangt ferli, en einnig frekar spaugilegt.

Viðtalið við Þorvald í heild sinni má hlusta á hér.