Rannsókn miðar hægt: Flugdólgurinn ekki í forgangi

Enginn mannskapur vinnur að rannsókn máls flugdólgsins svokallaða. Þetta hefur Vísir frá Jóhannesi Jenssyni, yfirmanni rannsóknardeildar lögreglunnar á Suðurnesjum.

Icelandair kærði manninn í janúar 2013 fyrir að sýna ógnandi tilburði, hrækja á fólk og ráðast á farþega í vélinni. Líma þurfti manninn niður eftir að hann var yfirbugaður. Málið vakti heimsathygli á sínum tíma en Vísir greindi frá því í síðustu viku að manninum stæði til boða að fljúga með Icelandair á ný eftir flugbann.

„Þetta hefur ekki verið forgangsmál hjá okkur. Þetta hefur verið til rannsóknar í deildinni hjá mér og málið er enn statt hjá okkur.“ Jóhannes segir rannsóknina komna á veg en þó hafa engar vitnaskýrslur verið teknar í málinu þrátt fyrir að atvikið hafi gerst fyrir nánast einu og hálfu ári. Það er þó líklegt að einhverjar vitnaskýrslur verði teknar að sögn Jóhannesar.

En er ekki hætt við að minni fólks bregðist fyrst svo langt er liðið? Hefði ekki verið betra að taka vitnaskýrslur strax?

„Jú auðvitað. Þetta er viðvarandi vandi hjá okkur að við komumst ekki yfir öll þau mál sem eru hjá okkur.“

Hvað hefur þá gerst í rannsókn málsins?

„Ég er ekkert að fara að tjá mig um þetta í einhverjum smáatriðum við þig. Þetta er ennþá á borðinu hjá okkur.“

Jóhannes segist enga hugmynd hafa um hvenær málinu lýkur. „Við munum reyna að ljúka rannsókninni og koma málinu frá okkur.“

Er enginn þrýstingur af hálfu Icelandair að málinu ljúki?

„Þeir hafa haft samband og spurst fyrir um málið.“

Maðurinn er íslenskur ríkisborgari en býr erlendis. Líkt og Vísir greindi frá í janúar þegar umræða um málið stóð sem hæst gæti maðurinn fengið allt að 6 ára fangelsisdóm fyrir að stofna öryggi flugsins í voða.