Myndbandið var falsað

Ótrúlegt myndband, sem fimleikafólk úr Ármanni birti á dögunum og sýndu ótrúleg tilþrif eins liðsmanna sinna, Jóns Sigurðar Gunnarssonar, er ekki jafn gott og leit út í fyrstu. Í myndbandinu sést Jón Sigurður sveifla sér í hringi á slá og spyrna knetti langa vegalengd ofan í körfu - fjórum sinnum í röð.

Myndbandið var hreinlega ótrúlegt. Einhver gæti sagt of gott til að vera satt, sem var einmitt raunin. Í tilkynningu frá Símanum kemur fram að það sé að vísu ekki hægt að útiloka svona heppni, en atvikið á sér aðra og töluvert tæknilegri skýringu, hann fékk nefnilega aðstoð eins fremsta tæknibrellufyrirtæki landsins, Reykjavík IO, svo boltinn rataði rétta leið.

Svo segir í tilkynningu Símans:

„Jón og félagar unnu myndbandið í samstarfi við Símann, sem er styrktaraðili RIG, eftir hugmynd og útfærslu EnnEmm. Reykjavik International Games. Leikarnir standa til 27. Janúar. Keppt er í átján greinum. Þúsundir taka þátt, þar á meðal nærri fjögur hundruð erlendir keppendur. Mótið hefur verið haldið frá árinu 2007."

Það er óhætt að segja að myndbandið hafi slegið í gegn á netinu, meðal annars hefur bandarískt fyrirtæki falast eftir því. Ekki er ljóst hvort það tilboð standi enn eftir að í ljós kom að því er breytt með hjálp tækninnar. En verði það selt fær fimleikafélagið ágóðann.